Reseı prezıdenti Vladımır Pýtın Ýkraınanyń shyǵysyndaǵy Donbass aımaǵyn qorǵaımyz degen jeleýmen arnaıy áskerı operasıa bastaıtynyn málim etti.

"Reseı Ýkraınada ıadrolyq qarý bar ekenin joqqa shyǵarmaıdy. Reseı Ýkraına aımaǵyn basyp alýdy josparlap otyrǵan joq. Jaǵdaı sheshýshi áreketterdi talap etedi. Ýkraınadaǵy barlyq halyq egemen bolýǵa degen quqyǵyn qoldanýy mańyzdy. Yqtımaldy qantógis tolyqtaı ýkraın rejıminiń moınynda bolady" dep keltirdi Pýtınniń sózderin TASS agenttigi.

"TASS" Ýkraınanyń Kıev, Harkov qalalarynyń mańynda atys daýsy estilip jatqanyn málim etti.

Buǵan deıin Reseı prezıdenti Donbasstaǵy ózderin táýelsiz dep jarıalaǵan "Donesk halyqtyq respýblıkasy" men "Lýgansk halyqtyq respýblıkasynyń" egemendigi men táýelsizdigin moıyndaý týraly jarlyqqa qol qoıǵan.

"Donesk halyqtyq respýblıkasy" men "Lýgansk halyqtyq respýblıkasy" – Ýkraınanyń shyǵysynda ornalasqan Donbass aımaǵyna kiretin Donesk jáne Lýgansk oblystary aýmaǵynda ózin táýelsiz dep jarıalaǵan separatıstik memleket. 2014 jyly Ýkraınadaǵy saıası daǵdarys barysynda jańa úkimetke qarsylyq retinde paıda bolǵan. Táýelsizdikterin 2014 jylǵy 12 mamyrda jarıalaǵan. Sodan beri keshegi kúnge deıin olardyń táýelsizdigin ishinara táýelsiz dep tanylǵan Ońtústik Osetıa respýblıkasy ǵana moıyndaǵan. Birikken ulttar uıymy, Eýro odaq, Eýropa qaýipsizdik jáne yntymaqtastyq uıymy sekildi halyqaralyq bedeldi uıymdardyń eshbiri separatıstik respýblıkalardyń táýelsizdigin moıyndamaǵan.

Ýkraına bıligi separatıstik memleketterdi Reseı federasıasy basyp alǵan Donesk jáne Lýgansk oblystarynyń bir bóligi dep tanıdy. Reseı bolsa, Donbasstaǵy qarýly qaqtyǵysqa qatysy baryn joqqa shyǵarady. Ýkraına konstıtýsıasyna saı, "DHR" men "LHR" ıelik etetin aýmaq Ýkraınanyń memlekettik egemendigi áreket etetin aımaq bolyp sanalady. Qazirgi ýaqytta separatıstik respýblıkalar burynǵy Donesk pen Lýgansk oblystary aýmaǵynyń úshten bir bóligin baqylaıdy. Ózderi eki oblys aýmaǵyna tutas ıelik etemiz dep esepteıdi. Qos respýblıka da Ýkraınada terorıstik dep tanylǵan.