Qazaqstannyń eks-prezıdenti Nursultan Nazarbaev qańtar oqıǵasyna deıin jáne odan keıin qaıda bolǵany anyqtaldy. Bul týraly QazTAG redaksıasy habarlady.

Agenttik taratqan aqparatqa súıensek, Nazarbaev 2022 jylǵy 3 qańtarǵa deıin Almaty oblysynda bolǵan.

"Óziniń týǵan aýylynda, Jambyl jáne Qarasaı aýdandaryndaǵy turaqty demalys oryndarynda boldy. Almatydaǵy oqıǵalar jappaı sıpat ala bastaǵanda, ony qańtardyń 4 kúni túnde Dýlatı kóshesindegi (burynǵy Naýaı kóshesi) jeke rezıdensıasynan eshkimniń nazaryn aýdarmas úshin qosalqy joldar arqyly áýejaıǵa apardy. Buǵan memlekettik kúzet qyzmetkerleri men Almaty qalalyq jol polısıasy arnaıy batalónynyń shekteýli sany kýá" delingen agenttik derekkózinde.

Artynsha eks-prezıdent Aqmola oblysynda júrgen.

"Prezıdent Qasym-Jomart Toqaev 4-5 aqpanda Olımpıadaǵa sapary kezinde Nazarbaev Býrabaı kýrortynda bolǵan. Ol óziniń rezıdensıasynda 5 kún demaldy. Bul joly ol kýrortqa avtokólikpen barǵan, buryn ol tikushaqpen kelýshi edi" delingen habarlamada.

Agenttik ádette Nazarbaev Býrabaıǵa kelerde onda úzdik kúzet toby, birneshe brondalǵan kólik jáne sıgnaldardy sóndiretin tehnıka bar arnaıy KamAZ keletinin jazdy. Tipti eki áskerı tikushaq pen jedel áreket etý toby kezekshilikte turatyn. Alaıda bul joly munyń eshqaısysy bolmaǵan. Sondaı-aq Nazarbaevtyń keıbir kúzet ofıserleri aýysqan.

Derekkóz Nazarbaev buǵan deıin Qazaqstan úkimetine tıesili (tirkeý nómiri UP-EC501) №1 Eurocopter EC 225LP Super Puma II + tikushaǵyn paıdalanǵanyn atap kórsetedi. Onyń ushyp-qonýy kezinde kem degende bir áskerı tikushaq qatar júrgen. Derekkóz onyń avtokólikpen júrýin densaýlyq jaǵdaıymen baılanystyrady.

"Prezıdent Toqaev qańtar aıyna deıin reseılik MI-8 tikushaǵymen ushatyn, bul Eýrokopterden áldeqaıda arzan" delingen agenttik habarlamasynda.

Derekkóz aqpan aıynyń basyna deıin Nazarbaev Qazaqstanda bolǵanyn, qazirgi ýaqytta Birikken Arab Ámirliginde ekenin aıtady.

"Nazarbaev qazir koronavırýs pandemıasy órship turǵanda 100 mıllıon dollardan astam aqshaǵa satyp alynǵan Airbus 320 NEO ushaǵymen saıahattap júr. Nazarbaevtyń TMD elderi basshylarynyń kezdesýine ushqan Airbus A330 iri ushaǵy elordalyq Nursultan Nazarbaev atyndaǵy áýejaıdyń angarynda tur" delingen aqparatta.