Reseı-Ýkraına soǵysy kezinde Reseıdiń Astrahan oblysy Volodar aýdanynda turatyn etnıkalyq qazaq qaza tapqan. Bul týraly Azattyq radıosy Eýropa qyzmetiniń jýrnalısi Toldar Baktemır habarlady. Jýrnalısiń jazbasyn Bessımptomno telegram arnasy jarıalady.

"Astrahandaǵy barlyq derlik qazaq otbasynyń áskerde adamy bar, óıtkeni bul – osyndaǵy kópshilik úshin áleýmettik qozǵalystyń jalǵyz qoljetimdi túri. Elestetińizshi, siz ultyńyzǵa bola ekinshi sortty azamat sanalatyn memlekette turasyz. Sosyn sizdi alady da Ýkraınadaǵy ózderi fashıs dep ataıtyndarǵa qarsy soǵysýǵa jiberedi" deıdi Toldar Baktemır twitter-de.

Toldar Baktemır sondaı-aq Astrahan oblysyna birneshe etnıkalyq qazaqtyń máıiti jetkizilgenin, qaza tapqandardyń biriniń anasy balasyn Ýkraınadaǵy "áskerı oqý-jattyǵýǵa" dep alyp ketkenin týraly aıtqanyn málim etti.

Jýrnalıs tanysynyń sózinshe, bul jaqtaǵy kedeıshilik pen rasızmniń kesirinen  astrahandyq qazaqtar janbaǵý men el kórýdiń jalǵyz amaly retinde áskerı qyzmetti tańdaýǵa májbúr ekenin jetkizedi.

Reseı bıligi birneshe kúnge jalǵasyp jatqan Ýkraınadaǵy áskerı qımyldar kezinde adam shyǵyny bolǵany týraly tek keshe ǵana habarlady. Oǵan deıin óz áskeri jaǵynda qaza tapqandar joq dep kelgen. Ýkraına tarapynyń sońǵy aqparattarynda shaıqastar kezinde 4 myńnan astam Reseı áskeri mert bolǵany aıtylady.