«AMANAT» partıasynyń atqarýshy hatshysy Asqat Oralov jumys saparymen Almaty qalasyna keldi.

Partıa baspasóz qyzmetiniń málimetinshe, Asqat Oralov qalalyq fılıaldyń kezekten tys konferensıasyna qatysqan. Osy jıynda delegattar «AMANAT» partıasy fılıalynyń jańa tóraǵalyǵyna Almaty qalasynyń ákimi Erbolat Dosaevty saılady.

Partıanyń atqarýshy hatshysy fılıal jańa basshylyǵynyń aldynda partıany modernızasıalaýdy eskere otyryp, jumysty jandandyrý jáne saılaýaldy mindettemelerdiń sapaly oryndalýyn baqylaý mindetteri turǵanyn atap ótti.

«Ózderińiz biletindeı, memleket basshysy, «AMANAT» partıasynyń tóraǵasy Qasym-Jomart Toqaev halyqpen keri baılanys jasaýda transparenttilikti arttyryp, qoǵamnyń barlyq ókilderimen jumysty kúsheıtý boıynsha mindetter qoıdy. Partıanyń barlyq saılaýaldy ýádelerin – azamattardyń talap-tilekterin, «amanattaryn» oryndaý negizgi basymdyq bolyp qala beredi. Bul rette biz memlekettik organdardan sıfrlar talap etetin tájirıbeden alshaqtaýymyz kerek. Azamattardyń pikirlerin eskere otyryp, baǵdarlamanyń tarmaqtaryn naqty iske asyrýǵa yqpal etetin proaktıvti formatqa aýysýymyz qajet», - dep atap ótti Asqat Oralov.

Osy kúni Asqat Oralov zıaly qaýym ókilderimen jáne partıa ardagerlerimen de kezdesti. Olardyń ishinde áıgili akter, teatr jáne kıno rejıseri Asanáli Áshimov, Qazaqstan Jazýshylar Odaǵy tóraǵasynyń orynbasary Aqberen Elgezek, aqyn Júrsin Erman, jazýshy Smaǵul Elýbaı jáne t.b. bar.

Ashyq pikir almasý barysynda zıaly qaýym ókilderi partıa qyzmetin jetildirý jónindegi óz pikirlerin ortaǵa salyp, memleket basshysy, partıa tóraǵasy Qasym-Jomart Toqaevtyń halyqtyń ál-aýqatyn arttyrýǵa jáne Jańa Qazaqstandy qurýǵa baǵyttalǵan bastamalaryna qoldaý bildirdi.

Jumys saparynyń alǵashqy kúni Atqarýshy hatshy qalalyq máslıhattaǵy «AMANAT» partıasy fraksıasynyń múshelerimen keńes ótkizdi. Ol osy jıynda depýtattarǵa jumysty kúsheıtýdi jáne qalalyq saılaýaldy baǵdarlamanyń oryndalýyna sapaly baqylaý uıymdastyrýdy taǵy bir ret tapsyrdy.

«Almatylyqtarǵa bergen barlyq ýádelerdi oryndaý qajet. Baqylaýdy kúsheıtý maqsatynda Almaty qalasyna arnalǵan saılaýaldy baǵdarlamanyń áleýmettik tusyn Búro múshelerine, al jol kartasynyń ındıkatorlaryn partıa óńirlik fılıaly Saıası keńesiniń múshelerine bekitý qajet», - dep atap ótti Asqat Oralov.