Eks-prezıdent Nursultan Nazarbaevqa tıesili qorǵa qaraıtyn "Jasyl-Jer" kompanıasy eshqandaı básekesiz tender arqyly 6 jylda Aqorda, Úkimet úıi, Mınıstrler úıi, Qarjy mınıstrliginiń ǵımaraty, Tuńǵysh prezıdent mýzeıi jáne Beıbitshilik kóshesinde ornalasqan ákimshilik ǵımaratty kútip-ustaý men abattandyrý jumystary úshin memleketten 7 mlrd 636 mln teńge alǵan. Bul týraly jýrnalıs Mıat Káshibaı óziniń telegram kanalynda jazdy.
Jýrnalıstiń aıtýynsha, mekeme bıylǵa 1 mlrd 530 mln teńgeniń tenderin jeńip alǵan. Memlekettik satyp alý "bir kózden satyp alý" tártibi boıynsha, ıaǵnı básekesiz, ashyq konkýrssyz júrgizilgen.
"Memlekettik satyp alý portalyndaǵy aqparatqa qaraǵanda, 2021 jyly 24 jeltoqsanda Prezıdenti is basqarmasyna qarasty "Prezıdenttiń ákimshiligi men úkimet ákimshilik ǵımarattary dıreksıasy" dep atalatyn kásiporyn "Jasyl-Jer" kompanıasymen eki kelisimshart jasasty. Bireýiniń quny 773 mln, ekinshisiniki 757 mln. Kelisimshartqa sáıkes, «Jasyl-Jer» JSHS 2022 jyly joǵaryda atalǵan alty ǵımarat aýmaǵynyń qaryn kúrep, baý-baqshasyn kútýge mindetti.
Eki tender de "bir kózden satyp alý" tásili boıynsha ótken. Iaǵnı, tapsyrys berýshi ashyq konkýrs jarıalamaǵan, tikeleı "Jasyl-Jer" kompanıasymen kelisimshart jasasqan" deıdi jýrnalıs.
Keıingi alty jylda "Prezıdenttiń ákimshiligi men úkimet ákimshilik ǵımarattary dıreksıasy" kásiporyny dál osy "Jasyl-Jer" kompanıasymen 23 kelisimshart jasasqan. Olardyń jalpy sommasy – 7 mlrd, 636 mln teńge. "Jasyl-Jer" JSHS barlyǵynda tenderdi "tikeleı bir kózden satyp alý" tásili arqyly alǵany belgili boldy.
"Jyl saıyn Prezıdent is basqarmasyna qarasty mekemeden mıllıardtap tender alyp otyrǵan "Jasyl-Jer" JSHS-nyń Qazaqstan eks-prezıdenti Nursultan Nazarbaevqa qatysy bar. Qalaı deısiz be? Baıandap bereıin. Muqıat oqyńyz, shatasyp qalýyńyz múmkin.
"Jasyl-Jer" JSHS 2005 jyly sáýirde qurylǵan. Bastypqyda quryltaıshylary jeke adamdar boldy. Al 2012 jyldan 2020 jylǵa deıin kompanıaǵa Nazarbaevtyń túrli qorlary ıelik etti. Naqtyraq aıtqanda, 2012 jyldan 2017 jylǵa deıin "Fond-Invest" Múlik basqarý dıreksıasy" degen kompanıa "Jasyl-Jer" JSHS-nyń quryltaıshysy boldy. Al bul kompanıanyń quryltaıshysy – Nazarbaevtyń "Elbasy qory" dep atalatyn qory.
Budan keıin, 2017 jyly Nazarbaevtyń "QR tuńǵysh prezıdenti – Elbasynyń qory" degen qory birneshe aı boıy "Jasyl-Jer" JSHS-nyń quryltaıshysy boldy. Al 2017 jyldyń qyrkúıeginen 2020 jyldyń aqpanyna deıin bul kompanıaǵa "Jyljymaıtyn múlikti basqarý jónindegi dıreksıa" JSHS quryltaıshylyq etti. Bul JSHS da Nazarbaevtyń "Elbasy qory" degen qoryna tıesili.
Qoryta aıtqanda "Jasyl-Jer" kompanıasyna segiz jyl boıy Nazarbaev ıelik etti. Sol kezeńde kompanıa memleketten mıllıardtaǵan tender alyp, qyrýar paıda tapty. Tipti, "Jasyl-Jer" JSHS Nazarbaev prezıdent bolyp turǵan kezdiń ózinde de Prezıdent is basqarmasyna qarasty kásiporynnan tender alyp otyrdy. Bul – Nazarbaevtyń memlekettik qyzmette júrip te bıznespen aınalysqanyn dáleldeıtin birden-bir fakt" deıdi ol.
Mıat Káshibaıdyń sózinshe, 2020 jyldyń aqpanynan bastap "Jasyl-Jer" kompanıasynyń quryltaıshysy jeke adamdar bolǵan. Solardyń biri – Tilendi Qýǵabaev degen azamat. Ol bul kompanıany birneshe jyl basqarady, keıin quryltaıshysy da boldy. Qazir de Qýǵabaev "Eco city group" degen kompanıa arqyly "Jasyl-Jer" JSHS-ǵa ıelik etip otyr.
"Ashyq derekózdegi aqparatqa qaraǵanda, Tilendi Qýǵabaev bir kezderi "Qazaqstan Respýblıkasy Parlamenti Sharýashylyq basqarmasynyń Qyzmettik turǵyn úılerdi paıdalaný jónindegi dıreksıasy" degen memlekettik kásiporyndy basqarǵan. Almatydaǵy áıgili "Alataý" sanatorııiniń dırektory bolǵan. Byltyr Azattyq radıosy bul demalys orynyna Nazarbaev ıelik etetinin anyqtaǵan edi. Soǵan qaraǵanda, Tilendi Qýǵabaevty Nazarbaevtyń senimdi adam dep topshylaýǵa negiz bar" dep jazady jýrnalıs.
Pikir qaldyrý