İshki ister mınıstrligi Qazaqstannyń birqatar qalasynda jarylǵysh zattar qoıylǵany týraly habarlamalar kelip túskenin málim etti.
"Qazaqstannyń birqatar qalasynda túrli obektilerinde ornatylǵan jarylǵysh qurylǵylar týraly kelip túsken habarlamalarǵa baılanysty kelýshiler men personaldy evakýasıalaý, ǵımarattardy qorshaý júrgizildi, arnaıy tehnıka men qyzmettik-izdestirý ıtterin qoldana otyryp, tıisti qyzmetter men mamandardyń obektilerdi tekserýi qamtamasyz etildi" dep habarlaǵan mınıstrlik birde-bir derek rastalmaǵanyn, atalǵan faktiler boıynsha QR Qylmystyq kodeksiniń 273-baby boıynsha sotqa deıingi tergeý bastalǵanyn jetkizdi.
Atalǵan bap boıynsha 5 jylǵa deıingi merzimge bas bostandyǵynan aıyrý jazasy kózdelgen.
"İshki ister mınıstrligi salynǵan jarylǵysh zat týraly kórineý jalǵan aqparat taratý qylmystyq jaýaptylyqqa ákep soǵatynyn eskertedi. Turǵyndardy sabyrlyq saqtaýǵa, ótkiziletin is-sharalarǵa jáne qabyldanatyn qaýipsizdik sharalaryna túsinistikpen qaraýǵa jáne tek resmı aqparatqa senýge shaqyramyz" delingen aqparattyq habarlamada.
102 nomerine Qaraǵandyda mamandandyrylǵan halyqqa qyzmet kórsetý ortalyǵyna, elordada "My car" jáne "Lexus" avtosalondaryna, "Han-SHatyr" men "Mega Silk Way saýda oıyn-saýyq ortalyqtaryna mına qoıylǵany týraly aqparat túsken. İİM aqparatty tekserip, shaqyrý jalǵan bolǵanyn anyqtaǵan. Qazirgi ýaqytta Qaraǵandyda jalǵan shaqyrý jasady delingen kútikti ustalǵany habarlandy.
Pikir qaldyrý