Pýtın beısenbi kúni qol qoıǵan jarlyqtan keıin Eýropa paıdalanatyn gazdyń úshten birin joǵaltyp alý qaýpi aldynda tur. Reseı gazyna qatty táýeldi Germanıa qazirdiń ózinde tótenshe jaǵdaı qaýpine qamdanyp, áreketter josparyn iske qosty. Bul týraly jalpyeýropalyq Euractiv.com medıa jelisi habarlady.
Reseı prezıdenti Vladımır Pýtın "jumadan bastap sheteldik satyp alýshylar Reseı gazyn rúblmen satyp alýy kerek bolmasa jetkizý toqtatylady" degen talap qoıǵan. Pýtın satyp alýshylar Gazprombankten rúblmen esepshottar ashýǵa tıis, osy shottar arqyly jetkizilgen gazǵa tólem jasalady dep málimdedi.
Eýropalyq kapıtal bul qadamdy "bopsalaý" áreketi dep baǵalady.
Energoresýrs eksporty – Reseıdiń Ýkraınaǵa basyp kirýine baılanysty reseılik bankterge, bıznesmender men Pýtın jaqtastaryna salynǵan Batys sanksıalaryna qarsy Pýtınniń eń qýatty yqpal etý tetikteriniń biri.
Eýrokomıssıa prezıdenti Ýrsýla fon der Láıe sanksıalardy aınalyp ótýge jol berilmeıtinin, "energıany bospalaý úshin qoldanatyn ýaqyt ótti" degendi aıtty.
Germanıa kansleri Olaf Shols beısenbide Batys elderi Reseı gazyn eýromen nemese dollarmen satyp alýdy jalǵastyra beretinin málim etti.
Germanıanyń energetıkalyq kompanıalary jetkizýde kirdiris bolsa nemese Reseı gaz jetkizýdi toqtatsa, qalaı áreket etý jóninde Berlınmen tyǵyz kelissóz júrgizip jatqany belgili boldy.
Qazirgi tańda Eýropa elderi balama joldardy izdep jatyr, alaıda ol shekteýli bolyp tur. AQSH óziniń suıytylǵan otynyn usynady, biraq Reseı gazynyń ornyn almastyrýǵa ol jetpeıdi.
Soǵan qaramastan Fransıanyń ekonomıka mınıstri Brúno Le Mer Germanıaǵa jasaǵan saparynda Parıj ben Berlın "reseılik gaz bolmaıtyn jaǵdaıǵa daıyndalyp jatqanyn" jetkizgen.
Pikir qaldyrý