Prezıdent Q.Toqaev Qazaqstan musylmandary dinı basqarmasynyń tóraǵasy, bas múftı Naýryzbaı qajy Taǵanulyn qabyldady. Bul týraly Aqorda saıty habarlady.

Kezdesýde prezıdent Qazaqstan musylmandaryn qasıetti Ramazan aıynyń bastalýymen quttyqtaǵan.

"Qasym-Jomart Toqaevqa Qazaqstan musylmandary dinı basqarmasynyń atqaryp jatqan jumystary men aldaǵy jospary týraly baıandaldy. Naýryzbaı qajy Taǵanulynyń aıtýynsha, múftıat osy jyldy «Islam – yntymaq pen birlik dini» dep jarıalaǵan. Osyǵan baılanysty elimizde jyl boıyna  atalǵan taqyrypta forýmdar ótkiziledi. Sonymen qatar din men dástúrdi sabaqtastyra otyryp, jas qyz-kelinshekterdi ımandylyqqa baýlıtyn «Ájeler mektebiniń» ashylǵany jaıly aıtyldy" delingen Aqorda habarlamasynda.

Kezdesý barysynda Qazaqstan musylmandary dinı basqarmasynyń Oraza aıynda uıymdastyratyn sharalary týraly málimet berilip, Naýryzbaı qajy aldaǵy ýaqytta Túrkitildes elderdiń bas múftıleriniń alqasy qurylatynyn jetkizgen.