Sybaılas jemqorlyqqa qarsy qyzmet Qaırat Satybaldyuly men Gúlmıra Satybaldy jáne basqa da tulǵalarǵa qatysty tergeý barysynda anyqtalǵan keıbir aqparattardy jarıalady.

"Tergeý barysynda Q.Satybaldyulynyń baqylaýyndaǵy kásiporyndardyń – kirme temirjol jelileri (sońǵy shaqyrym) ıeleriniń urlyǵynyń qosymsha faktileri anyqtaldy. Atalǵan tulǵalar Memlekettik organdardyń laýazymdy tulǵalarynyń kómegimen eldiń qala quraýshy kásiporyndaryna kirme joldardyń qyzmetterine tarıfti negizsiz kóterý arqyly kóp mıllıardtyq paıda tapqan. Bul óz kezeginde azamattar úshin tirshilikti qamtamasyz etý qyzmetteriniń baǵalarynyń artýyna baǵyttalǵan. Q. Satybaldyuly baqylaýyndaǵy eki kompanıanyń basshylary ustalyp, sot sanksıasymen qamaýǵa alyndy. Kinálilik týraly qorytyndy sheshimdi sot anyqtaıdy" delingen Antıkor habarlamasynda.

Qaırat Satybaldyuly 13 naýryz kúni qamaýǵa alynǵan. Ol eks-prezıdent Nursultan Nazarbaevtyń nemere inisi. Eldegi baı adamdardyń biri. Kezinde ulttyq qaýipsizdik komıtetinde, "Kazakh Oil", "Qazaqstan temir joly" ulttyq kompanıalarynda istegen. "Kaspi.kz" aksıonerlik qoǵamynyń negizgi aksıoneri bolǵan. Dinı ortalarda yqpaldy adam sanalady. Ol Islam dininiń Sáláfızm aǵymynyń beldi ókili degen beıresmı aqparat bar.

Qaırat Satybaldyulynyń burynǵy áıeli 17 naýryzda qamaýǵa alynǵan Gúlmıra Satybaldynyń kásipker, belgili prodúser Baıan Maqsatqyzynyń kúıeýi Tursyn Alagózovtyń kompanıasyn reıderlik jolmen tartyp alýǵa qatysy bar ekeni týraly habarlanǵan.