Italıanyń Qazaqstandaǵy jańadan taǵaıyndalǵan Tótenshe jáne Ókiletti elshisi Marko Albertımen kezdesý barysynda saýda-ekonomıkalyq jáne mádenı-gýmanıtarlyq yntymaqtastyqty nyǵaıtý, sondaı-aq ınovasıalar men jańa tehnologıalar salasyndaǵy  seriktestik máseleleri talqylandy.

Italıa Qazaqstannyń negizgi saýda seriktesteriniń tizimine kiredi, sondaı-aq respýblıkanyń iri ınvestorlarynyń biri bolyp tabylady. Bul rette Almatyda ıtalándyq kapıtaldyń qatysýymen 100-den astam kásiporyn belsendi jumys isteıdi, al el boıynsha olardyń jalpy sany  280. Taraptar sondaı-aq Almatynyń ındýstrıaldy aımaǵynda tamaq ónimderin óndirý boıynsha Italıanyń qatysýymen fýd-klaster qurý perspektıvalaryn talqylady.

Kezdesý barysynda bıyl eki el arasyndaǵy dıplomatıalyq qarym-qatynastardyń ornaǵanyna 30 jyl tolýyna oraı elshiliktiń  ekijaqty qarym-qatynastardy nyǵaıtý jáne jańa deńgeıge kóterý úshin 30 bastama daıyndap jatqany atap ótildi. Máselen, Almatyda Ortalyq Azıa men Kavkaz óńirinde alǵashqy ıtalándyq mádenı ortalyqtyń ashylýy jáne qyrkúıekte mádenı kórme ótkizý josparlanyp otyr. Almatynyń birqatar joǵary oqý oryndarynda stýdentter ıtalán tilin úırenýde, Qazaqstanda alǵash ret ıtalán tilin oqytý Almaty mektepteriniń birinde bastaldy.

Qala basshysy men Italıanyń Qazaqstandaǵy Tótenshe jáne Ókiletti elshisi  aǵymdaǵy jyldyń  maýsymynan  bastap Almaty – Mılan – Almaty baǵyty boıynsha tikeleı áýe qatynasynyń iske qosylýy elder arasyndaǵy saýda-ekonomıkalyq jáne mádenı baılanystardy nyǵaıtyp, týrızmniń damýyna serpin beretinine senim bildirdi. Elshi qalalar deńgeıindegi dıplomatıa halyqtar arasyndaǵy baılanystardy nyǵaıtýǵa oń áser bere alatynyn atap ótti.

Elshi Italıa tarapynyń Almatyda kreatıvti ındýstrıalardyń ınovasıalyq ortalyǵyn qurýdy qarjylandyrýǵa daıyn ekenin málimdedi. Marko Albertıdiń aıtýynsha, ol Italıadan Qazaqstanǵa ınvestısıalar aǵynyn edáýir ulǵaıtýdy óziniń mindeti dep sanaıdy. Erbolat Dosaev Almaty respýblıkaǵa sheteldik ınvestısıalardy tartý úshin hab bola alatynyna senim bildirdi. Sondaı-aq, Taraptar Almatynyń ındýstrıalyq aımaǵynda, birinshi kezekte tamaq ónimderin óndirý boıynsha birlesken kásiporyndar qurý perspektıvalaryn   da   talqylady.

Almaty ákimi sondaı-aq osy jyldyń aqpan aıynda qyzmetke kirisken Indonezıa elshisi Mohammad Fadjrýl  Rahmanmen kezdesý ótkizdi. Kelissózder barysynda taraptar Almaty ınfraqurylymyn damytý maqsatyndaǵy ınvestısıalyq yntymaqtastyqtyń perspektıvalaryn talqylady.

Halyqaralyq týrısik kórmege qatysý úshin Almatyǵa kelgen  elshi  jyl saıyn 10 myńǵa jýyq qazaqstandyq keletin Almaty men Balı arasynda baýyrlas  qarym-qatynas ornatýdy usyndy.

Qazirgi kezde qalada ındonezıalyq kapıtaldyń qatysýymen 2 kásiporyn jumys isteıdi. Eki el arasyndaǵy taýar aınalymy 2021 jyldyń qorytyndysy boıynsha 13,5 mln AQSH dollaryn qurady, 2020 jyldaǵy kórsetkishpen salystyrǵanda 12,5%-ǵa artqan.

Kezdesýge qatysýshylar ózara tıimdi yntymaqtastyqty odan ári damytý úshin aıtarlyqtaı áleýet pen perspektıvalyq baǵyttardy atap ótti.