Tuńǵysh prezıdent Nursultan Nazarbaevtyń mártebesi el konstıtýsıasyna bekitiletini onyń ókiletin arttyrmaıdy, kerisinshe taryltady. Bul týraly konstıtýsıany ózgertý jónindegi jumys tobynyń múshesi Ermek Ábdirasulov jýrnalıs Nartaı Aralbaıulyna bergen suhbat barysynda málim etti.
Onyń aıtýynsha, konstıtýsıaǵa Nursultan Nazarbaev "táýelsiz Qazaqstannyń negizin qalaýshy" degen tirkes tek Nazarbaevtyń tarıhı rólin aıqyndaý úshin ǵana qosylǵan. Bul eks-prezıdentke eshqandaı ókilet bermeıdi. Kerisinshe endi Nursultan Nazarbaevqa aıryqsha quzyretter men kepildikter beretin 2000 jyly qabyldanǵan "Qazaqstan Respýblıkasynyń Tuńǵysh Prezıdenti - Elbasy týraly" konstıtýsıalyq zań kúshin joıady.
Atalǵan zań eks-prezıdentti qylmystyq jaýapkershilikten bosatatyn, oǵan saı ózi men birge turatyn týystarynyń dúnıe-múlkine eshkim qol suǵa almaıtyn, banktik shottarynyń banktik qupıalyǵyna jáne olarǵa tıispeýshilikke kepildik beriletin.
Ermek Ábdirasulov Nursultan Nazarbaev prezıdent bolyp turǵan kezindegi sheshimderi úshin jaýap bermeıtinin, biraq qyzmetin asyra paıdalanyp, qylmystyq áreketterge barǵany anyqtalsa, zań aldynda jaýapty bolatynyn atap ótti.
Buǵan deıin Ermek Ábdirasulov tuńǵysh prezıdent mártebesi konstıtýsıada "táýelsiz Qazaqstannyń negizin qalaýshy" retinde aıqyndalatynyn habarlaǵan. Buǵan áleýmettik jelide kópshilik qarsylyq bildirgen. Konstıtýsıalyq ózgeristi bastapqyda jurtshylyqtyń basym bóligi eks-prezıdenttiń ımýnıteti kúsheıtilgeli jatyr dep túsinip qalǵan.
Pikir qaldyrý