Densaýlyq saqtaý mınıstri Ajar Ǵınıat pandemıa kezinde búdjetten qansha qarjy jumsalǵany týraly aıtyp berdi.  2020 jyly memlekettik qazynadan koronavırýsqa qarsy kúres úshin 252 mlrd teńge bólingen. 

– Bul qarajattyń 28 mlrd teńgesi dári-dármek pen medısınalyq tehnıka satyp alýǵa jumsalǵan. 197 mlrd teńge dárigerler men SES qyzmetkerleriniń eńbekaqysyn, ústemeaqysyn, is-sapar shyǵyndaryn tóleýge jumsaldy. Sonymen birge 20 mlrd teńge medısınalyq saqtandyrý qory arqyly halyqqa kórsetetin medısınalyq kómek aqysy tólendi. Sonyń ishinde 5 mlrd teńge Dúnıejúzilik bank arqyly jasandy tynys alý aparattaryn satyp alýǵa jumsaldy, –  dedi mınıstr. 

Onyń aıtýynsha, atalǵan salaǵa 2021 jyly búdjetten 556 mlrd teńge bólingen. 

– Byltyr koronavırýstyń 3 tolqyny boldy. Jyl boıyna koronavırýs ınfeksıasyna qarsy kúres júrgizildi. Vaksına men ıne satyp alýǵa jáne túrli zerthanalyq zertteýlerge 97 mlrd teńge jumsaldy. Sondaı-aq dárigerlerdiń eńbekaqysy men ústemaqysyna, is-sapar shyǵyndaryna 413 mlrd teńge, al medısınalyq saqtandyrý qorynan qyzmet aqysyna 40 mlrd teńge tólendi, – dedi Ajar Ǵınıat. 

Al bıyl búdjetten densaýlyq saqtaý salasyna 86 mlrd teńge bólingen. Jyl basynan beri  9 mlrd teńge Vero Cell men QazVac ekpelerin alýǵa jumsalsa, 20 mlrd teńge byltyr satyp alynǵan Pfizer aqysyn tóleýge arnalǵan.

– Osylaısha pandemıa kezinde búdjetten jalpy sany 894 mlrd teńge bólindi, –  dep sózin qorytyndylady mınıstr.