Aqyn ári qoǵam qaıratkeri Oljas Súleımenov Almaty qalasynda baspasóz konferensıasyn ótkizip, burynǵy "Qazaqstan halyq kongresi" partıasyn jandandyratynyn málimdedi. Bul týraly Ulysmedia.kz. saıty habarlady.

Partıanyń negizgi maqsaty – eldi halyqpen birlese otyryp damytý, shaǵyn kásipkerlikke kóńil bólý jáne shaǵyn bıznes ókilderine jeńildikter jasaý. Bastamashyl top aldaǵy ýaqytta partıany tirkeý prosesin bastap, ádilet mınıstrligine yntaly top tizimin usynbaq.

Oljas Súleımenov baspasóz konferensıasynda eldegi til saıasatyna baılanysty da pikirin bildirgen. Ol "orys tilinen bas tartqan Ýkraına óz memlekettiginen aıyrylyp qaldy" deıdi

– Halyq monotildi bolýy kerek degenmen kez kelgen saıasatker kelispeıdi. Bul – múmkin emes jaǵdaı. Biz sovet odaǵy kezinde kóptildi memleket retinde qalyptasyp qoıdyq. Óz oıymyzdy qazaq tilinde de, orys tilinde de jetkize alamyz. Sol sebepti eki tildiń birin shettetýge bolmaıdy. Bul – zıan. Biz qazir Ýkraınada ne bolyp jatqanyn kórip otyrmyz. 2014 jyly darynsyz saıasatkerler ýkraın tilin eldegi jalǵyz zańdy til dep jarıalap, orys tilin zańdy statýsynan aıyrdy. Qazir sonyń zardabyn shegip, Ýkraına óz memlekettiginen aıyrylyp otyr, – deıdi Oljas Súleımenov.