Reseıdegi "Birinshi arna" telearnasynyń burynǵy qyzmetkeri Marına Ovsánnıkova tikeleı efır kezinde Ýkraınadaǵy soǵysqa qarsy aksıa jasaǵany úshin adam quqyǵy boıynsha Vaslav Gavel atyndaǵy syılyqqa ıe boldy, dep jazady dw.com.
Naýryz aıynda Ovsánnıkova "Birinshi arnanyń" keshki jańalyqtar efırinde sóılep otyrǵan dıktordyń artyna shyǵyp, "Soǵysty toqtatyńdar! Propagandaǵa senbeńder. Bul jerde ótirik aıtady" degen jazýy bar plakat ustap, soǵysqa qarsy aksıa jasaǵan.
Ol Reseıde bolyp jatqan oqıǵalardy Djordj Orýelldiń "1984" romanyndaǵy álemmen salystyrady.
Ovsánnıkova halyqty Reseıdiń Ýkraınaǵa agresıasyn toqtatýdy talap etýge shaqyryp, áleýmettik jeli arqyly vıdeo úndeý jasaýdy jalǵastyryp keledi. Keıin oǵan zańsyz aksıa ótkizgeni úshin 30 myń rúbl aıyppul salynǵan.
Tergeý komıteti Qylmystyq kodekstiń "Reseı áskeri týraly jalǵan aqparat taratý" degen jańa baby boıynsha Ovsánnıkovany tergep jatyr. Atalǵan bappen sottalǵan adam 3 jyldan 15 jylǵa deıin bostandyǵynan aıyrylýy múmkin.
Pikir qaldyrý