Qazaqstannyń tuńǵysh prezıdenti Nursultan Nazarbaev nemen aınalysyp júrgenin aıtty.
– Saıasatkerdiń otstavkadan keıin nemen aınalysyp júrgeni mańyzdy emes degen oıdamyn. Sebebi, saıasatkerler keledi, ketedi. Al el men jer qalady. Elimizdiń damýy, aldaǵy ýaqytta qandaı ózgerister kútip turǵany budan da mańyzdy. El basqarǵan ýaqytymda barlyq kórshi eldermen, batys elderimen jaqsy qarym-qatynas qura bildik. Biz halyqaralyq saıası arenada qurmetke ıemiz. Qazaqstandyqtar kez kelgen elge baryp demalyp, iskerlik qarym-qatynas ornata alady, – dedi ol saıasatker Danıar Áshimbaevqa bergen suhbatynda.
Sondaı-aq Nazarbaev ózge eldiń prezıdentterimen áli kúnge deıin aralasyp turatynyn atap ótti.
– Meniń otstavkamnan keıin kezinde birge istegen kóptegen memlekettiń lıderi habarlasyp, óz elderine qonaqqa shaqyrdy. Men olardyń bárine rızamyn. Keıbirimen áli kúnge deıin baılanysymyz úzilgen joq, –dedi Nazarbaev.
Nazarbaev Eýrazıalyq ekonomıkalyq odaq, Túrki memleketteri uıymynyń qurmetti tóraǵasy ekenin, ózi qurǵan qordyń jumysyna kóńil bólip júrgenin aıtty. Sondaı-aq ol jahandyq ıadrolyq qaýipsizdik máselelerin de nazardan tys qaldyrmaǵanyn jetkizdi. Budan bólek óziniń ómiri men qyzmeti týraly estelik jazyp jatqanyn da aıtqan.
– Búginde meniń oıym da, tilegim de – Qazaqstannyń turaqtylyǵy men gúldenýi jaıly. Bizdiń urpaǵymyz bizden de kóp is tyndyrǵanyn qalaımyn. Olarǵa bul iste shyn júrekten tabys tileımin, -– dep suhbatty qorytyndylady Nursultan Nazarbaev.
Pikir qaldyrý