Májilis depýtattary, «AMANAT» partıasy fraksıasynyń músheleri Snejanna Imasheva, Málik Qulshar jáne Qazaqstan halqy Assambleıasy atynan saılanǵan Avetık Amırhanán qurylys materıaldaryn óndiretin «Oral saýda-ónerkásiptik kompanıasy» zaýytynda boldy.

Halyq qalaýlylary zaýyt qyzmetkerlerine Konstıtýsıaǵa engiziletin ózgerister men tolyqtyrýlardyń mańyzdylyǵyn túsindirip, aldaǵy referendýmǵa belsendi atsalysýǵa shaqyrdy.

– Prezıdent Qasym-Jomart Toqaev Konstıtýsıaǵa ózgerister engizý boıynsha respýblıkalyq referendým ótkizýdi usyndy. Referendým – Joldaýda jarıalanǵan reformalardy halyqtyń tańdaýymen júzege asyrý.  Memleket basshysy árqashanda azamattardy sheshim qabyldaýǵa belsendi qatysýǵa shaqyryp keledi. Konstıtýsıalyq ózgerister boıynsha endi aralas saılaý júıesi arqyly partıaǵa múshe emes azamattar da Parlamentke saılana alady. Eger referendýmda daýys berýshiler osy ózgeristerdi qoldasa, onda biz Prezıdent aıtqan jańa, ádiletti Qazaqstan qurýǵa múmkindik alamyz. Bul – elimizdiń damýy úshin mańyzdy qadam, – dedi Snejanna Imasheva.

Al depýtat Qulshar Málik elimizdiń bolashaǵy árbir azamattyń tańdaýyna baılanysty ekenine nazar aýdardy.

Depýtat Avetık Amırhanánnyń aıtýynsha referendým árbir adam úshin óziniń azamattyq ustanymyn kórsetýge múmkindik beredi.

– Konstıtýsıa memlekettiń eń basty qujaty. Oǵan engiziletin ózgeristerde qazaqstandyqtardyń pikiri aıryqsha mańyzdy, – dedi ol.

 Odan ári kásiporyn qyzmetkerleri tolǵandyrǵan suraqtaryn qoıyp,  usynystaryn jetkizdi.

Depýtattar jınalǵandardyń áleýmettik máselelerge qatysty saýaldaryna jaýap berip, túsindirý jumystaryn júrgizdi.

«Oral saýda-ónerkásip kompanıasy» – Qazaqstandaǵy polıetılen trýbalaryn óndiretin oblystaǵy eń iri kásiporyndardyń biri. Óndiristik keshen 12 sehtan turady.

Kásiporyn jylyna 37 500 tonna polıetılen óndiredi. Qazaqstandy qamtamasyz etýmen qatar, Reseıge, Ózbekstanǵa, Qyrǵyzstanǵa tasymaldaıdy. 

 QR Parlamenti májilisi apparatynyń baspasóz qyzmeti