Májilis depýtattary Elnur Beısenbaev pen Mádı Ahmetov Almaty qalasyndaǵy elimizdegi jetekshi joǵarǵy oqý oryndardyń biri Qazaq bas sáýlet-qurylys akademıasynyń ujymymen jáne  stýdentterimen kezdesti.

Onda depýtattar Konstıtýsıaǵa engizilgen túzetýler týraly jan-jaqty túsindirdi.

– Konstıtýsıa kez kelgen memlekettiń irgetasy. Qazirgi qoǵamda ózgerister úlken suranysqa ıe. Referendým ótetin kúnge deıin az ǵana ýaqyt qaldy. Árbir azamat el damýynyń jańa kezeńin qalyptastyrýǵa qatysyp, úlesin qosýǵa múmkindik týdy, – dedi Elnur Beısenbaev.

Óz kezeginde partıa músheleri árbir qazaqstandyqtyń aldynda mańyzdy sheshim qabyldaý mindeti turǵanyn atap ótti.

– Qazir elimizdiń barlyq óńirleri men eldi mekenderinde memleketimizdiń basty qujatyna túzetýler engizýge qatysty aýqymdy aqparattyq-túsindirý jumystary júrgizilýde. Biz almatylyq jastarmen kezdesýde olardyń referendýmǵa degen qyzyǵýshylyǵy joǵary ekenin baıqadyq. Sebebi, is-sharalarda kóptegen ózekti taqyryptar kóterilip, stýdentter suraqtar qoıyp, óz pikirlerin ashyq bildirdi. El Prezıdenti usynǵan negizgi reformalar olardyń qoǵamdyq-saıası bolashaǵyna degen senimin nyǵaıtýda, – dedi depýtat Mádı Ahmetov.

Kezdesý sońynda qatysýshylardyń kópshiligi konstıtýsıalyq túzetýler jobasy boıynsha el turǵyndarynyń jalpyǵa birdeı daýys berýi birligimizdi arttyrady degen ortaq pikirge keldi.

«AMANAT» partıasynyń Almaty qalalyq fılıalynyń aqparaty boıynsha