"Bugin Holding" IT kompanıasy 9 jyldyq mereıtoıyna oraı Ál-Farabı atyndaǵy Qazaq Ulttyq ýnıversıtetiniń Ulttyq kitaphanasynda derekti fılm kórsetti. Fılmde kompanıa osy 9 jylda ushyrasqan qıyndyqtar men jetken jetistikter, óz salasyndaǵy jetekshi kompanıaǵa aınalý jolý jáne kompanıa qyzmetkerleriniń qyzyqty oqıǵalary kórsetilgen.

İs-shara barysynda kompanıanyń negizin qalaýshy Aıbek Qýatbaev derekti fılmniń negizgi maqsatyn túsindirip, sharaǵa kelgen qonaqtar men stýdentterge alǵysyn bildirdi. 

– Birinshiden barshańyzdyń otbasyńyz ben jasap jatqan kásipterińizge sáttilik tileımin. Búgingi sizderge usynylyp otyrǵan derekti fılm kompanıanyń búginge deıin atqarǵan jumystarynyń jalpy esebi desek te bolady. Aldaǵy ýaqytta da halyqqa paıdaly ári sapaly ónimder daıyndaýdy jalǵastyra bermekpiz. Kompanıa ónimderin Qyrǵyzstan men Ózbekstan elderine de shyǵarý josparda bar, – dedi Aıbek Qýatbaev. 

"Bugin Entertainment" stýdıasynyń prodússeri Laýra Artyqbaeva derekti fılm túsirýdiń negizgi ıdeıasyna toqtalyp ótti. 

– Bul – bizdiń búginge deıin jasaǵan aýqymdy jobalarymyzdyń biri de biregeıi desem de bolady. Fılmnen ózderińizge kerek bilim ala alasyzdar dep senemin. Men jalpy fılm túsirý ıdeıasynyń qaıdan kelgenine toqtalyp ótsem dep edim. Alǵashynda jańadan keletin qyzmetkerlerge arnalǵan tanymdyq rolık retinde túsirý josparlanǵan edi. Alaıda búginge deıingi atqarǵan jumystardy, kompanıanyń negizgi qundylyǵyn bir rolıkke syıǵyzý múmkin bolmady. Sodan derekti fılm túsirý týraly ıdeıa keldi. Aıbek myrza da ıdeıany birden qoldaı ketti. Derekti fılm osylaı jaryqqa shyqty. Sizderge de bul fılm shabyt syılaıdy, úlken bilim beredi degen senimdemiz. Barshańyzǵa alǵys aıtamyn, – dedi Laýra Artyqbaeva. 

İs-shara sońynda kórermender arasynda derekti fılm jóninde suraqtar qoıylyp, syılyqtar tabystaldy.