Reseı prezıdenti Vladımır Pýtın jyl sońyna deıin "Sarmat" aýyr qurlyqaralyq balıstıkalyq zymyranynyń daıyn bolatynyn málimdedi. Bul týraly ol áskerı joǵary oqý oryndarynyń túlekterimen kezdesý kezinde aıtqan, dep jazady focus.ua basylymy.

Reseı prezıdenti Ýkraınaǵa qarsy soǵys kezinde qarýly kúshti nyǵaıtatynyn habarlady. 

"Aýyr kontınentaralyq "Sarmat" balıstıkalyq zymyrany synaqtan sátti ótkizildi. Jyl sońynda qarýdyń alǵashqy legi jetkizilýi tıis" dedi Pýtın. 

Reseı Federasıasynyń Qorǵanys mınıstrligine silteme jasaǵan RIA Novostı Sarmat eń qýatty ıadrolyq zymyran ekenin habarlaǵan. 

"Sarmattyń" dáldeý qashyqtyǵy 18 myń shaqyrymdy quraıdy, bastapqy salmaǵy  – 208,1 tonna, paıdaly júkteme massasy – 10 tonnaǵa jýyq. Buryn Reseıdiń ıadrolyq qarý "Voevoda" dep atalatyn. NATO bul qarýǵa "Satana" degen ataý qoıǵan. 

Jaqynda Germanıa áýe kúshteriniń basshylyǵy NATO elderi tótenshe jaǵdaıda ıadrolyq qarýdy qoldanýǵa daıyn bolýy kerek dep habarlaǵan bolatyn.

SIRPI uıymy sarapshylarynyń pikirinshe, búginde qyrǵı-qabaq soǵystan keıin alǵash ret ıadrolyq qarýdy qoldaný qaýpi arta túsken.