Konstıtýsıadan Elbasy mártebesi týraly normany alyp tastaýdy kózdeıtin zań osy jyldyń sońyna deıin qabyldanady. Bul týraly májilis spıkeri Erlan Qoshanov málimdedi, dep habarlady Sputnik Qazaqstan saıty.
Májilis kýlýarynda jýrnalıser spıkerden tuńǵysh prezıdent Nursultan Nazarbaevtyń mártebesine qatysty referendýmda maquldanǵan túzetýler qashan qabyldanatynyn suraǵan.
"Biz kúzde qarastyrýǵa kirisemiz. Jyl sońyna deıin qabyldaýymyz kerek. Prezıdent bizdiń aldymyzǵa osyndaı mindet qoıdy", - dedi Qoshanov.
Aıtýynsha, ádilet mınıstrliginde konstıtýsıalyq jáne basqa da zańdarǵa ózgerister engizý boıynsha jumys toby qurylǵan. Másele osy jumys toby aıasynda qaralady. Zań jobalary ázirge májiliske túspegen.
5 maýsymda konstıtýsıalyq túzetýler boıynsha ótken búkilhalyqtyq referendým nátıjesine saı, eldiń negizgi zańynan "Tuńǵysh prezıdent týraly" zańdy joıý arqyly tuńǵysh prezıdent Nursultan Nazarbaevtyń mártebesi týraly erejeler alynyp tastalady.
Sondaı-aq qabyldanǵan túzetýlerge sáıkes Konstıtýsıanyń 42-babynan tuńǵysh prezıdentke memleket basshysy laýazymyna qatarynan eki retten artyq saılaný quqyǵyn beretin ereje kúshin joıady. Sonymen qatar 46-baptan tuńǵysh prezıdenttiń mártebesi men ókilettigi Konstıtýsıamen jáne tıisti Konstıtýsıalyq zańmen aıqyndalatyny týraly tarmaq joıylady.
Pikir qaldyrý