SHQO ákimi Danıal Ahmetov bastamasymen energetıka mınıstrligi birneshe apta buryn «Tarbagatay Munay» kásipornyna qatysty tekserýdi bastaǵan bolatyn.

Esterińizge salsaq, kompanıa eger olarǵa Qytaıǵa gaz eksporttaýǵa tyıym salynsa, aýdan eldi mekenderin kógildir otynnan ajyratatyny týraly málimdegen, osydan keıin Zaısan aýdanynyń turǵyndary narazylyq bildirgen edi.

«Tarbagatay Munay» usynǵan últımatýmdy oblys basshylyǵy shantajǵa balady. Olar energetıka mınıstrligine júginip, jaǵdaıdyń shynaıy mánin tekserýdi ótindi. Tekserý aıaqtalǵanǵa deıin Qytaıǵa gaz jetkizý toqtatyldy. Búginde nátıjelerdi aıtýǵa bolady, jańa eldi mekenderdiń júıege qosylýyn eskere otyryp, aýdandy jabdyqtaý úshin gaz lımıti anyqtaldy. Bul kórsetkish – 325 mıllıon tekshe metr, ol 10 jyl úzdiksiz qamtýǵa jetkilikti. Al eksport kólemi – 70 mıllıon tekshe metr.

– Sizder barlaýdy jalǵastyrýlaryńyz kerek, sáıkesinshe boljamdy qorlar da kóbeıýi kerek, – dedi aımaq basshysy Danıal Ahmetov «Tarbagatay Munay» ókilderimen kezdesýde.

– Bul rette halyq ózderine tıesili kólem ózgerissiz qalatynyn bilýi tıis, ol – 325 mıllıon tekshe metr. Mine, bizdiń ýaǵdalastyq – osy. Eger sizder osymen kelisseńizder, bul másele syndarly sheshiledi, – dedi ol.

Kompanıa ókilderi munaı ken ornyn ıgerýdi bastaǵandaryn, qosymsha gaz Zaısan aýdanyn qamtý merzimin 10 jyldan 30 jylǵa deıin ulǵaıtýǵa múmkindik beretinin jetkizdi. Al eksporttan túsken qarjy naq osy maqsatqa jumsalmaq. Olar, sondaı-aq, turǵyndar úshin gaz baǵasynyń kóterilmeıtinin atap ótti. Óz kezeginde oblys ákimi aýdandaǵy eldi mekenderdi odan ári gazdandyrý boıynsha barlyq mindetter oryndalatynyn qadap aıtty.

SHQO Aqparat ortalyǵy