Belgili shetel ádebıetiniń qazaq tiline aýdarylǵan kezekti týyndylary oqyrmanǵa jol tartty. Bul joly batystyq balalar ádebıetiniń kórnekti shyǵarmalary aýdarylǵan. "Mazmundama" qoǵamdyq qory "Bank SentrKredıt" aksıonerlik qoǵamynyń demeýshiligimen qalyń kópshilikke Shon Kovıdiń "Jasampaz jasóspirimderdiń 7 daǵdysy. Utqyr ári ozyq bolýdyń joldary" jáne Sabol Stefanıdiń "Kún júıesi qaıda ornalaskan?" atty kitaptardy usynyp otyr. Osyǵan oraı Almaty kitap baspa úıinde kitaptardyń tanystyrý rásimi ótti.
İs-sharaǵa kitaptardyń jaryq kórýine atsalysqan shyǵarmashylyq top, K.Baıseıitova atyndaǵy daryndy balalarǵa arnalǵan mektep-ınternat oqýshylary, "Igra" akterlik mektebiniń shákirtteri, Lermontov atyndaǵy ulttyq orys teatrynyń akterleri men "Jas Sahna" teatrynyń akterleri qatysty.
Balalar men jasóspirimderdi qarjylyq turǵyda saýattandyrýǵa baǵyttalǵan "Bank SentrKredıt" Junior bank jobasynyń jetekshisi Nurgúl Nurmaǵambetova bank bıylǵy balalar jylynda balalar men jastar ádıebıetin qoldaýdy uıǵarǵanyn, elde balalar ádebıeni kenjelep turǵanyn, sol olqylyqtyń ornyn toltyrý nıetimen osy joba júzege asqanyn atap ótti.
İs-shara barysynda balalarǵa arnalǵan kitaptardy aýdaryp, kópshilikke usyný ıdeıasyna bank ystyq yqylas tanytqany aıtylyp, "Bank SentrKredıt" AQ Basqarma teraǵasy Ǵalym Hýsaınovtyń arnaıy joldaǵan sózi oqyldy.
"Biz óskeleń urpaqqa jiti kóńil bólemiz. Álemdik deńgeıdegi týyndylardyń qazaq tiline aýdarylýy manyzdy ıdeologıa dep oılaımyn. Bala – erteńgi el azamaty, al jastar – eldiń bolashaǵy. Sol sebepti kitap oký – bolashaqqa salynatyn ınvestısıa. Jalpy, bank balalarǵa arnalǵan kóptegen áleýmettik bastamalardy qoldap qana qoımaı, derbes jobalardy da júzege asyryp keledi. Qazirgi tańda biz shahmat federasıasyn, "Balany qorǵaý" jobasyn mektepterge engizip, bank bólimshelerinde Junior bank negizinde balalarǵa arnalgan Kids room bastamasyn júzege asyryp jatyrmyz" delingen Ǵalym Hýsaınovtyń sózinde.
"Mazmundama" qoǵamdyq qorynyń basshysy Teńiz Seıilhan aldyn ala tapsyryspen kitaptardyń elektrondyq nusqasyn da alýǵa bolatynyn málim etti.
– "Mazmundama" qoǵamdyq qory osy ýakytqa deıin dúnıejúzine mıllıondaǵan danamen taraǵan bestsellerlerdi, álem ádebıetiniń jaýharlaryn, tanymdyq týyndylardy, jalpy alǵanda 70-ke jýyq kitapty qazaq tiline aýdardy. Bizdiń maqsatymyz – qazaq tiliniń mazmunyn baıytý arqyly qazaq jastarynyń ana tilinde mańyzdy aqparattardy alýyna yqpal etý. Osy maqsatty júzege asyrý jolynda bizge qoldaý kersetip, demeýshi bolǵan "Bank SentrKredıt" AQ basshylyǵyna alǵys aıtqymyz keledi, – dedi Teńiz Seıilhan.
Qos kitapty shyǵarý jumysyn atqarǵan shyǵarmashylyq top múshesi, belgili jýrnalıs Sáken Sybanbaı Shon Kovı ákesi Stıven Kovıdiń álemdik bestsellerge aınalyp úlgergen "Jasampaz jandardyń jeti daǵdysy" eńbegin oqyp shabyttanyp, "Jasampaz jasóspirimderdiń 7 daǵdysy. Utqyr ári ozyq bolýdyń joldary" kitabyn jazǵanyn aıtady. Sózinshe, tanymdyq ári psıhologıalyq eńbek jastardyń psıhologıalyq erekshelikterin eskerip jazylǵan. Ol jerdegi ómirden alynǵan naqty mysaldar jastardyń kóptegen saýaldaryna jaýap berip, olarǵa baǵyt-baǵdar berýge kómektesedi.
Al "Kún júıesi qaıda ornalaskan?" kitabynda astronomıanyń jańa dáýiriniń bastalýy, ǵalymdar ashqan jańalyqtar, NASA-nyń qazirgi mısıalary baıandalady.
Tanystyrý rásimi barysynda K.Baıseıitova atyndaǵy daryndy balalarǵa arnalǵan mektep-ınternat oqýshylary án shyrqap, "Jas Sahna" teatrynyń akterleri kitaptardan úzindiler oqydy.
Bestseller týyndylardyń qazaqsha nusqalary búginde eldiń barlyq kitap dúkenderine satylymǵa shyqty.
Pikir qaldyrý