Qazaqstan temir joly kompanıasynyń baspasóz qyzmeti eldegi aptap ystyqqa baılanysty poıyz qozǵalysynyń jyldamdyǵyna shekteý qoıylǵanyn habarlady.

Kompanıa habarlamasynda qazirgi ýaqytta soltústik jáne shyǵys oblystarda aýa temperatýrasy +40°S, ońtústik jáne batys oblystarda +45°S deıin kóterilip, bul relsterdiń + 58°S - 62°S-qa deıin qyzýyna ákelip soǵatynyn aıtylǵan.

"Sondyqtan "Qazaqstan temir joly" UK AQ qozǵalys qaýipsizdigin qamtamasyz etý maqsatynda poıyzdar qozǵalysynyń jyldamdyǵyna shekteýler qoıyp otyr. Osyǵan baılanysty poıyzdar dittegen jerine kesheýildep jetedi. Kompanıa keltirilgen qolaısyzdyqtarǵa jolaýshylardyń túsinistikpen qaraýyn suraıdy. Qolaısyz aýa-raıy poıyz mashınısiniń jumysyn da aıtarlyqtaı qıyndatatyny bar. Lokomotıv brıgadalaryna aptap ystyq kezinde poıyzdardy erekshe tártipte ustaý tapsyryldy" delingen QTJ aqparatynda.