Premer-mınıstr Álıhan Smaılov senat depýtattarynyń áıelderdiń zeınet jasyn tómendetý másele kótergen depýtattyq saýalyna jaýap berdi.
Úkimet basshysynyń jaýabynda usynys qarastyrylatyny týraly naqty jaýap joq. Tek zeınet jasyn kóterýge negiz bolǵan sebepter túsindirilgen. Onyń sózinshe, áıelderdiń zeınet jasyn erlerdikimen teńestirý saıasaty búdjet qarajatyn únemdeý úshin emes, joǵary zeınetaqy mólsherin qamtamasyz etý úshin engizilgen.
"Qazaqstandyqtar búdjetten bazalyq jáne yntymaqty zeınetaqy alady. Yntymaqty zeınetaqy azamattardyń 1998 jylǵa deıingi 2 eńbek ótili men sońǵy 3 jyldyq tabysy negizinde eseptelinedi. Nátıjesinde jyl saıyn bul tólemniń túri kemip, jınaqtaýshy zeınetaqy úlesi ósetin bolady. Sondyqtan zeınet jasyn tómendetý zeınetaqy salymdarynyń kóleminiń kemýine jáne osy júıeden beriletin tólemderdiń de kúrt qysqarýyna alyp keledi. Bul álemdik praktıka, ıaǵnı ómir súrý uzaqtyǵynyń ósýine baılanysty zeınet jasyn kóterý úrdisi damyǵan memleketterde de, kórshiles Ázerbaıdjan, Armenıa, Reseı, Belorýs elderinde de qolǵa alynýda" deıdi premer-mınıstr.
Qazaqstanda 2018 jyldan bastap áıelderdiń zeınet jasy jyl saıyn 6 aıǵa joǵarylap keledi. 2028 jyly áıelderdiń zeınet jasy erlerdikimen teńesip, áıelder zeınetke 63 jasta shyǵatyn bolady. Qazirgi ýaqytta áıelder úshin zeınet jasy 60-61 jas aralyǵynda.
Buǵan deıin Úkimet azamattardyń keı kategorıalarynyń zeınet jasyn tómendetýdi qarastyratyny, másele jyl sońyna deıin belgili bolatyny habarlanǵan.
Qazaqstanda áıelder úshin zeınet jasyn túsirý nemese burynǵydaı 58 jasqa qaıta ákelý jıi kóteriledi. Elde prezıdentten áıelderdiń zeınet jasyn 58-ge deıin, qaraýynda erekshe balalary bar analardyń zeınet jasyn 55-ke deıin tómendetýdi suraǵan onlaın petısıa júrip jatyr. Oǵan qazirgi ýaqytta 800 myńnan astam qol jınalǵan.
Pikir qaldyrý