Qańtar oqıǵasynan keıin Qazaqstanda ustalyp, azaptaýǵa ushyraǵan qyrǵyz mýzykanty Vıkram Rýzahýnov ózine qatysty tergeý jumystarynyń aıaqtalǵanyn habarlady. Bul týraly mýzykant óziniń facebook paraqshasynda jazdy.

Onyń aıtýynsha,  Bishkek quqyq qorǵaý organdary tergeý nátıjelerin Qazaqstanǵa jiberedi.

"Sarapshylar densaýlyǵyma aýyr zıan kelgenin anyqtady. Jınalǵan materıaldar Qyrǵyzstannyń Bas prokýratýrasy arqyly kináli tulǵalardy anyqtaý jáne qylmystyq jaýapkershilikke tartý úshin Qazaqstannyń quzyrly organdaryna jiberiletin bolady", dedi Vıkram Rýzahýnov.

9 qańtarda "Qazaqstan" jáne "Habar 24" arnalary "Qazaqstandaǵy mıtıńke qatysqany úshin Qyrǵyzstan azamaty aqsha alǵan" degen sújet kórsetken. Vıdeoda beti-aýzy kógergen azamat 1 qańtarda beıtanys adamdar telefon arqyly habarlasyp, mıtıńige qatysý úshin 90 myń teńge usynǵanyn, bılet ápergenin, Qazaqstanda páterge ornalastyrǵanyn aıtady. 

Kóp uzamaı qyrǵyzstandyq basylymdar vıdeodaǵy adam Qyrǵyzstanda belgili jaz mýzykanty Vıkram Rýzahýnov ekenin, Qazaqstanǵa konsertke kelgenin jarysa jazdy. 

Uzamaı Rýzahýnov bosatylyp, 10 aqpan kúni áleýmettik jelidegi paraqshasynda Qazaqstannyń tergeý ızolátorynda azaptalǵanyn moıyndap, málimdeme jasady.

Aqpan aıynda Qyrǵyzstanda Vıkram Rýzahýnovtyń azaptalýyna baılanysty qylmystyq is qozǵalǵan.