Almatyda áleýmettik mańyzy bar azyq-túlik taýarlarynyń baǵasyn tejeý úshin aldyn alý sharalary qabyldanyp jatyr. Bul týraly qala ákimi Erbolat Dosaev Ortalyq komýnıkasıalar qyzmetinde ótken brıfıńte málimdedi.

Onyń aıtýynsha, «aınalym sqemasy» boıynsha qarjylandyrý 4 mlrd teńgege, 11 mlrd teńgeden 15 mlrd teńgege deıin ulǵaıtyldy. Belgilengen baǵamen satý úshin 6,5 myń tonna qant satyp alyndy. Sondaı-aq Túrkistan jáne Almaty oblystarynan, taıaý jáne qıyr  shetelderden kókónis pen jemis tikeleı jetkizý uıymdastyryldy.

«Nan baǵasyn turaqtandyrý úshin Azyq-túlik korporasıasymen jyl sońyna deıin kelisimshart jasaldy. Qant baǵasynyń ósý yqtımaldylyǵy, bakaleıa ónimderi qorlarynyń azaıý, Reseıge kókónis ónimderin jappaı eksporttaý táýekelderine baılanysty iri saýda jelilerine qant ákelýge jekelegen kvotalar bólý máselesi pysyqtalyp jatyr», - dedi ákim.