Emhanalarǵa túsetin júktemeni azaıtý jáne konsýltasıalyq-dıagnostıkalyq qyzmetterdiń qoljetimdiligin arttyrý úshin jyl sońyna deıin Kemel jáne Mamyr shaǵyn aýdandarynda 2 otbasylyq-dárigerlik ambýlatorıany salý jáne №11 qalalyq emhanany kúrdeli jóndeý jumystary aıaqtalady. Sondaı-aq Saıaly, Qarasý jáne Nurshashqan shaǵyn aýdandarynda 3 otbasylyq-dárigerlik ambýlatorıanyń qurylysy bastalyp, 2023 jyly aıaqtalady. Bul týraly Almaty ákimi Erbolat Dosaev Ortalyq komýnıkasıalar qyzmetinde ótken brıfıńte málimdedi.

«Emhanalardy zamanaýı medısınalyq jabdyqtarmen tolyq qamtamasyz etýge 1,7 mlrd teńge bólindi. Budan basqa, jyldyń sońyna deıin 2 emhana men 3 otbasylyq-dárigerlik ambýlatorıa, 2023 jyly taǵy 3 otbasylyq-dárigerlik ambýlatorıa salý úshin jobalaý-smetalyq qujattamany ázirleý jumystary aıaqtalady. Ana men bala ólimin azaıtý úshin bıyl Balalarǵa shuǵyl kómek kórsetý ortalyǵynyń jańa korpýsy salynyp bitedi, 4 perzenthana men 2 balalar stasıonaryn 2,8 mlrd teńgege tehnıkalyq jaraqtandyrý jaqsartylady. Qan aınalymy júıesi aýrýlarynan, onkopatologıalardan bolatyn ólim jaǵdaıyn azaıtý úshin úsh jyldyq baǵdarlama sheńberinde 6,9 mlrd teńge somasyna kóp beıindi stasıonarlar jańǵyrtylady», - dedi spıker.

Sondaı-aq, asa tapshy mamandyqtar boıynsha 240 dárigerdi daıarlaý jáne 1000 medbıkeni oqytý júrgizilýde. 2022 jyly medısınalyq-sanıtarlyq alǵashqy kómekti damytý medısınalyq qyzmetterdiń qol jetimdiligi men sapasyn arttyrady, ana ólimin 3 ese azaıtady.