Bıyl Óskemende 50 avtobýs satyp alyndy, taǵy 55 avtobýs jetkiziledi dep kútilýde. Avtoparktiń tolyq jańartylýy úsh jyl ishinde tolyq oryndalady. Bul týraly SHQO ákimi Danıal Ahmetov OKQ brıfıńinde málimdedi.

– Biz sýbsıdıalaý baǵdarlamasyn engizdik. Onyń búdjeti bizdiń bıznesmender suraǵandaı 3,7 mlrd. emes, biz oǵan 1,4 mlrd. shek qoıdyq, jańartý úsh jyl ishinde aıaqtalady, – dedi Danıal Ahmetov.

Birneshe jyl buryn oblys ortalyǵynyń tramvaı parkine Almatydan 11 tramvaı jetkizilgen bolatyn. Oblys ákiminiń aıtýynsha, búginde barlyq tramvaılar jumys isteýde. Qalada osy transport túri qalpyna keltirile bastady. Óıtkeni Óskemen turǵyndarynyń úshten biri elektr kóligin paıdalanady.

– Kelesi jyly biz tramvaı sharýashylyǵyna aıtarlyqtaı kúsh salamyz, elektr kóligi basqasha jumys isteıtin bolady. Bıyl Óskemende elektrondy bıletteý júıesin qalypty iske qosqanymyz kóńilimizdi qýantady. Bul júıe bıznes salasynyń tabysyn jasyrmaı, ashyq jumys isteýine ári osy júıede jumys isteıtin kásiporyndar kiristeriniń edáýir artýyna múmkindik jasady, – dep atap ótti Danıal Ahmetov.