Kıev qalasynda ótken samıtte BUU-nyń qaqtyǵys kezinde bolatyn jynystyq zorlyq-zombylyq jónindegi arnaıy ókili Pramılla Patten reseılik ásker tarapynan jasalǵan zorlaý oqıǵalary týraly málimdeme jasady, dep jazady BBC. Onyń aıtýynsha, Reseı men Ýkraına arasyndaǵy soǵys bastalǵannan beri BUU-ǵa reseılik ásker zorlyq-zombylyq jasaǵany týraly 150 shaǵym túsken.
"Biz tek aısbergtiń bir bóligin kórip otyrmyz. Búginge deıin Ýkraınadaǵy balalarǵa, áıelderge jáne erkekterge jasalǵan zorlyq-zombylyq jóninde 150 shaǵym tústi. Mundaı oqıǵa kez kelgen adamnyń ómirinde jazylmas jara bolyp qalatyny anyq. Sondaı-aq otbasynyń buzylýyna áser etip, keleshek urpaqqa da zıan tıgizedi", dedi Pramılla Patten.
Atalǵan samıt Ýkraına prezıdenti Vladımır Zelenskııdiń áıeli Elena Zelenskaıanyń uıymdastyrýymen ótken. İs-sharany Vladımır Zelenskıı ashty. Atalǵan jıynǵa Túrkıa, AQSH, Kanada, Ispanıa, Lıtva prezıdentteriniń áıelderi de qatysty.
