Búgin prezıdenttiń baspasóz qyzmeti Q.Toqaev kishi qajylyq jasap, Qaǵbaǵa kirgeni týraly aqparat jarıalady. Mekke qalasyndaǵy Qaǵbanyń esigi jylyna 2 ret tek laýazymdy tulǵalar men Saýd Arabıa basshylyǵy ruqsat etken erekshe qonaqtar úshin ashylady. Ol jerge kirgen adam duǵa jasap, tilek tileıdi. Búginge deıin Qaǵbaǵa Túrkıa, Ázerbaıjan, Túrkmenstan, Sıngapýr prezıdentteri kirgen. Eks-prezıdent Nursultan Nazarbaev ta Qaǵbaǵa kirý qurmetine laıyq dep tanylǵan, tipti birneshe ret. Ol bergen suhbattarynda Qaǵbada "eli úshin duǵa jasaǵanyn" aıtqan.

Nazarbaev neshe ret qajylyq jasady?

Nursultan Nazarbaev alǵash ret 1994 jyly Saýd Arabıasynyń astanasy Er-Rıadqa sapary barysynda kishi qajylyqty ótep, Qaǵbaǵa kirgen. Nazarbaevtyń Qaǵbaǵa barǵan sáti týraly 2012 jyly túsirilgen "Bolshaıa polıtıka bez galstýka" derekti fılminde aıtyldy.

Nazarbaevtyń alǵashqy qajylyǵy kezinde Qaǵbada jóndeý jumystary bolyp jatqan. Alaıda Nazarbaev Saýd Arabıa koroliniń ruqsatymen musylmandar úshin qasıetti orynǵa bas suǵý múmkindigine ıe bolǵan.

Keıin suhbattarynyń birinde Nazarbaev Qaǵbaǵa kirgen kezde "halqym úshin duǵa jasadym" degen. 

"Mekkede Allanyń úıi Qaǵbanyń ishine kirip turǵanda eń birinshi tilegim – halqyma jaqsylyq. Osy qıyn-qystaýdan elimdi aman-esen alyp shyǵyp, jaqsy ómirge jetýge bizdi qoldaı kór degenmin" degen eks-prezıdent vıdeoda. 

Keıin 2013 jyly Youtube jelisinde Nursultan Ábishulynyń tolyq qajylyq ótep júrgen vıdeosy tarady. Vıdeony jarıalaǵan SunnaPress.com saıtynyń jazýynsha, Qazaqstan prezıdentiniń qajylyqta júrgenin birneshe adam kórgen jáne "prezıdenttiń tóńiregindegi adamdar" muny rastaǵan. Alaıda bul týraly resmı derek joq. Tek túrkıalyq BAQ ókilderi Nazarbaev sol jyly Mekkede bolǵany týraly aqparat jarıalaǵan. 

Toqaevtyń Qaǵbaǵa kirgeni kópshiliktiń esine Nazarbaevtyń da qasıetti orynǵa barǵanyn túsirdi. Solardyń keıbiri "Nazarbaev tilegen duǵasyna ózi saı basshy bola almady, Toqaevtyń da baǵasyn qajylyqqa barýyna qarap emes, prezıdent retindegi istegen isine oraı berý kerek" dep jatyr.