Áskerde qaza tapqan mańǵystaýlyq Álibek Qalbaıǵa qatysty tergeý aıaqtaldy, dep habarlady Astana arnasy.
Basylym málimetinshe, marqummen áskerde boryshyn birge ótegen sarbaz kúdikti retinde qamaýǵa alynǵan. Sotqa deıingi tergeý kezinde kúdiktiniń kinásin dáleldeıtin materıal tolyǵymen jınaldy deıdi quzyrly organdar.
"Qatardaǵy jaýynger Qalbaıdyń qaıtys bolýy boıynsha qylmystyq istiń tergeýi aıaqtaldy. Qazirgi jaǵdaıda taraptar istiń qujattarymen tanysýda. Sodan keıin isti sotqa jiberetin bolamyz. Kúdikke áskerde birge júrgen Amanjolov degen jaýynger ilingen. Qazir ol sot sanksıasymen qamaýda otyr. Ol istiń materıaldarymen tanysýda" dedi Bas áskerı prokýratýranyń aǵa kómekshisi Erkin Qoja-Ahmet.
Buǵan deıin, Jambyl oblysyndaǵy áskerı bólimde qaza tapqan mańǵystaýlyq sarbazdyń týystary "qylmys tolyq ashylmady" dep narazylyq bildirgen bolatyn. Artynsha áskerı prokýratýra áskerdegi jaǵdaıdy jiti nazarǵa alǵanyn jetkizgen.
Mańǵystaýlyq sarbaz 23 sáýirde Jambyl oblysyndaǵy Gvardeısk áskerı qalashyǵynda kóz jumǵan. Prezıdent osy oqıǵaǵa qatysty Bas prokýratýra men qorǵanys mınıstrligine jáne quzyrly organdarǵa jan-jaqty tekserý júrgizýdi jáne shynaıy sebebin anyqtaýdy tapsyrǵan.
