Qazaqstannyń bas prokýratýrasy qańtar oqıǵasynan keıin ustalyp, azaptaýǵa ushyraǵan qyrǵyz mýzykanty Vıkram Rýzahýnovtyń isi boıynsha ony elge ákelý týraly kelissóz júrip jatyr.

Tengrinews.kz saıtynyń jazýynsha, 2022 jylǵy 10 aqpanynan bastap sybaılas jemqorlyqqa qarsy qyzmettiń Almaty oblysy boıynsha departamenti qyrǵyz jazmeni Vıkram Rýzahýnovqa qatysty azaptaýdy qoldaný deregi boıynsha Qylmystyq kodekstiń 146-baby 2-bóligi 1-tarmaǵy ("Adamdar toby nemese aldyn ala sóz baılasý arqyly adamdar toby jasaǵan azaptaýlar") boıynsha sotaldy tergeý amaldaryn júrgizip jatyr.

19 aqpanda Rýzahýnovty tergeý organy jábirlenýshi dep tanyǵan.

"Qazir is boıynsha Almaty qalasy, Almaty oblysy Polısıa departamenti, UQK SHQ qyzmetkerleri men medısına qyzmetkerlerinen jaýap alyndy, alaıda birqatar sebepke baılanysty kúdiktilerdi anyqtaý ázirge múmkin emes (beınejazbalar, kelýshiler men jetkizilgen adamdardy tirkeý jýrnaldary joq, barlyq qyzmetker betperde kıgen, onyń ishinde medısınalyq betperde kıgender de bolǵan)" dedi Bas prokýratýra ókilderi.

Sondaı-aq, oblystyq Polısıa departamentinen Rýzahýnovtyń oqıǵasyna qatysy bar barlyq qyzmetkerdiń sýreti talap etilgeni belgili boldy.

"Rýzahýnov qajetti tergeý áreketterin júrgizý úshin birneshe ret tergeý organyna shaqyryldy. Qazirgi ýaqytta qaýipsizdik sharalaryn qamtamasyz ete otyryp, elge kelýi týraly kelissóz júrgizilip jatyr" dedi Qazaqstan Bas prokýratýrasynyń ókilderi.

Buǵan deıin Vıkram Rýzahýnov Qyrǵyzstanda aqpan aıynda qozǵalǵan ózine qatysty tergeý jumystary aıaqtalǵanyn, Bishkek quqyq qorǵaý organdary tergeý nátıjelerin Qazaqstanǵa jiberetinin málim etken.

"Sarapshylar densaýlyǵyma aýyr zıan kelgenin anyqtady. Jınalǵan materıaldar Qyrǵyzstannyń Bas prokýratýrasy arqyly kináli tulǵalardy anyqtaý jáne qylmystyq jaýapkershilikke tartý úshin Qazaqstannyń quzyrly organdaryna jiberiletin bolady", degen Rýzahýnov.

9 qańtarda "Qazaqstan" jáne "Habar 24" arnalary "Qazaqstandaǵy mıtıńke qatysqany úshin Qyrǵyzstan azamaty aqsha alǵan" degen sújet kórsetken. Vıdeoda beti-aýzy kógergen azamat 1 qańtarda beıtanys adamdar telefon arqyly habarlasyp, mıtıńige qatysý úshin 90 myń teńge usynǵanyn, bılet ápergenin, Qazaqstanda páterge ornalastyrǵanyn aıtady. 

Kóp uzamaı qyrǵyzstandyq basylymdar vıdeodaǵy adam Qyrǵyzstanda belgili jaz mýzykanty Vıkram Rýzahýnov ekenin, Qazaqstanǵa konsertke kelgenin jarysa jazdy. 

Uzamaı Rýzahýnov bosatylyp, 10 aqpan kúni áleýmettik jelidegi paraqshasynda Qazaqstannyń tergeý ızolátorynda azaptalǵanyn moıyndap, málimdeme jasady.