Almaty qalasynyń analar keńesi «Mádenıetti ana – mádenıetti ult» respýblıkalyq jobasy aıasynda besik jyry saıysyn ótkizdi. Baıqaýǵa analar keńesiniń belsendi músheleri, sondaı-aq jastar ókilderi qatysty.
Joba QHA tóraǵasynyń orynbasary – QHA hatshylyǵynyń meńgerýshisi Marat Ázilhanovtyń tóraǵalyǵymen ótken Qazaqstan halqy Assambleıasy Analar keńesiniń respýblıkalyq otyrysynda usynylǵan.
Osylaısha, Almaty qalasynyń analar keńesi «Mádenıetti ana – mádenıetti ult» jobasynyń jol kartasy aıasynda besik jyrynyń konkýrsyn jarıalady. Baıqaýǵa etnomádenı birlestikterdiń analar keńesterinen toǵyz ótinim kelip tústi, olardyń ishinde: kúrd, túrik, uıǵyr, polák, nemis, Qyrym tatarlary, ázirbaıjan, túrikmen ortalyqtarynyń Analar keńesteri jáne «Assambleıa jastary» RQB bar.
Baıqaýdyń basty maqsaty – otbasylyq qundylyqtardy, ulttyq dástúrlerdi saqtaý jáne óskeleń urpaqty tárbıeleý. Baıqaýǵa qatysýshylar ózderiniń ana tilinde besik jyryn oryndady jáne munyń bári aldyn-ala daıyndalǵan beınerolıkte kórsetildi. Ár ortalyq óziniń shyǵarmashylyq qabiletterin kórsete otyryp, óz halqynyń mádenıetin kórsete aldy.
Osylaısha, búgin Almaty qalalyq Dostyq úıiniń qabyrǵasynda baıqaýdyń qorytyndysy shyǵaryldy. Barlyq qatysýshylardyń arasynan qazylar alqasy 9 úzdik jumysty tańdap, nomınasıalady, olarǵa qurmet gramotalary men baǵaly syılyqtar berildi.
Qatysýshylar arasynda ár túrli jastaǵy ókilder boldy. Túrikmen mádenı ortalyǵynyń ókili, 10 shóbereniń ájesi solardyń biri. Bul - ulttyq qundylyqtar sabaqtastyǵynyń keıingi urpaqqa jarqyn úlgisi. Baıqaýǵa qatysýshylar ózderiniń jaǵymdy emosıalarymen bólisip, bul baıqaý olardyń árqaısysyna ana mahabbaty men meıirimin sezinýge múmkindik bergenin atap ótti.
«Biz bul baıqaýǵa óte jaýapkershilikpen qarap, ár ortalyq óziniń ulttyq naqyshyn besik jyry arqyly kórsetýge tyrystyq. Sondaı-aq, biz jastarymyzdyń belsendi bolyp, jobalarymyzdy qoldaıtynyna qýanyshtymyz. Aldymyzda budan da qyzyqty ári tanymdy is-sharalar kútip tur» dep atap ótti Almaty qalasy Analar keńesiniń tóraıymy Mahınýr Israılova.
Almaty qalasy "Qoǵamdyq kelisim" mekemesiniń baspasóz qyzmeti
Pikir qaldyrý