Aqpan aıynan beri qamaýda otyrǵan tirkelmegen Demokratıalyq partıanyń lıderi Janbolat Mamaı ózine taǵylyp otyrǵan aıyptarmen tanysyp, áreketin qylmys deýge keletindeı eshteńe tappaǵanyn aıtady. Bul týraly ol abaqtydan jazǵan kezekti hatynda jetkizgen.
Onyń sózinshe, ózine juma kúni "Kúdiktiniń is-áreketin saralaý týraly jańa qaýly" atty 138 betten turatyn kólemdi qujat berilgen. Alaıda naqty ózine qatysty tus tek 10 betten turady. Mamaıdyń isimen Almatynyń arnaıy prokýrory aınalysyp jatyr.
Dempartıa lıderi is materıaldarynda kináli ekenin aıǵaqtaıtyn faktilerler retinde usynylǵan derekter esh qısynǵa kelmeıdi dep sanaıdy.
"Qaýlyda bylaı deıdi: "02.01.2022 j. tirkelmegen "Qazaqstannyń Demokratıalyq partıasynyń" lıderi J. M. Mamaı Facebook áleýmettik jelisinde Jańaózen qalasynda gaz baǵasynyń kóterilgenine qarsy mıtıń ótkeni týraly beıne úndeý jarıalady. Joǵaryda kórsetilgen Zań talaptaryna qaramastan (prokýror beıbit mıtıńter týraly túsindiredi – J.M.), 03.01.2022 jyly J. M. Mamaı Jańaózendi qoldaý maqsatyndaǵy óziniń áreketin jalǵastyryp, barlyq azamattardy saǵat 14.00-de Respýblıka alańynda jınalýǵa shaqyrdy".
Osyǵan qarap, zańdy suraq týady: munyń nesi qylmys? Tipti kázirgi repressıvti zańdar boıynsha da bul bar-joǵy ákimshilik is qana. Ol úshin, asyp ketkende, 15 táýlik beredi! 10 jylǵa túrmege kesý jazasyna qalaı tartsań da kelmeıdi!
Ári qaraı prokýror 4 qańtar kúngi oqıǵalar týraly jazady. Eń qyzyǵy osy jerde bastalady. Prokýrordyń myna jazǵanyna nazar aýdaraıyq: "04.01.2022 jyly 18.30 saǵat shamasynda J. M. Mamaı óz áreketi arqyly mıtıńke jınalýdy bildire otyryp, óziniń jaqtastarymen birge, "Almaty Arena" muz aıdyny saraıyna keldi" dep jazdy. Sonda men "jınalýdy" qalaı "bildirippin"? Olaı "bildiretin" bolsam, basqasha birdeńe isteýim kerek edi ǵoı? Mysaly, oq atyp, qıratyp, bir adamǵa aýyr zaqym keltirip degendeı? Ondaı áreketterge bardym ba? Árıne, joq. Onda ne nárseni "bildirippin?" Bul endi, prokýror qıalynyń qıanǵa shyqqany. Bálkim, osyndaı sandyraqqa toly qujattardy toltyra otyryp, olardyń ózderi «qylmysty ashyp» otyrǵandaryn "bildiretin" shyǵar?
Ári qaraı, prokýrordyń oıynsha, men taǵy bir qylmys jasappyn. Sonshama qyzý qandy ekenime ózim de tańqalyp otyrmyn. "Mıtıńke jınalýdy bildire" otyryp, ózim qylmys jasaýmen aınalysqan kórinem. Qandaı deısiz ǵoı? Ony bylaı deıdi: "Jańaózende, ózi úndeý jarıalaǵan tusta, 10 000 adam jınalyp tur degen aldyn ala jalǵan aqparat taratty, onysy shyndyqqa jatpaıdy". Meniń qylmysym osy eken! Olaı bolsa, sol kúnderi Aqtaý men Jańaózende 10-15myń narazylardyń turǵany týraly jazǵan qaptaǵan blogerler, jýrnalıser menimen kórshiles kameralarda otyrýy kerek edi ǵoı. Sodan keıin, bul faktini prokýratýra qalaı joqqa shyǵarmaqshy? Bas basynan sanap shyǵyp, "Mamaı shynymen qylmysker, óıtkeni alańda 10 000 emes, bar-joǵy 9999 adam boldy" deı me? Osyndaı da aıyp bola ma? Bul jaǵdaıda ózime osyndaı aıyp taǵyp otyrǵandarǵa "Jańa Qazaqstannyń prokýrorlary" muny jazǵanda, ne shegip edińder?" degen túrmeshe suraq qoıǵym kelip ketedi.
Járaıdy, osymen toqtasa ǵoı. Al, Nazarbaevtyń, oı keshirersizder, prokýror Nazarbaıdyń oıynsha, men ózimniń qylmystyq isterimdi ári qaraı da jalǵastyryppyn. Sonda meniń istegenderim mynaý eken: "Ári qaraı J. M. Mamaı, jınalǵan tobyrdyń kóńil-kúıine áser ete otyryp, jappaı tártipsizdik uıymdastyrýǵa baǵyttalǵan óziniń qylmystyq pıǵylyn órbitti... Qazaqstanǵa ádil úkimet, ashyq ta ádil saılaý, saıası reforma, saıası ózgeris kerek ekenin, Qazaqstanda osy kúnge deıin bir de bir ashyq ta ádil saılaý ótpegenin aıtyp, Parlamentti taratýdy, ashyq ta ádil saılaý ótkizýdi, saıası partıalardy tirkeýdi, Qaýipsizdik Keńesin taratýdy talap etti".
Bul aıtqandarymnyń nesi qylmys? Olaı bolsa, Aýǵanystandaǵy terrorıst tálipter syndy zańdar qabyldańdar. Kázir Aýǵanystan azamattaryna bılikti synaýǵa zańmen tıym salynǵan, óıtkeni, olardyń pikirinshe bul "musylmannyń senimin álsiretedi". Al, Qazaqstan bolsa, ózin sóz bostandyǵyna, pikir alýandyǵyna kepildik beretin demokratıalyq, zaıyrly memleket sanaıdy emes pe? Sonda meniń qylmysym qaısy? Eger joǵaryda atalǵandar qylmys dep sanalsa, onda bul pikirmen kelisetin qazaqstandyqtardyń basym kópshiligin sottaý kerek qoı?" degen ol qujattan prokýrordyń osyndaı shımaǵyn kórgenin aıtady.
Opozısıalyq saıasatker, tirkelmegen Demokratıalyq partıanyń lıderi Janbolat Mamaı aqpan aıynan beri qamaýda otyr. Ol aldymen qańtar oqıǵasy qurbandaryna arnalǵan qaraly mıtıńti uıymdastyrǵany úshin 15 táýlikke qamalyp, artynsha eki qylmystyq is boıynsha qamaý merzimi uzartylǵan. Oǵan aldymen "qarabet" deý arqyly quqyqqorǵaý organy qyzmetkerin qorlady, nesıe amnıstıasyna baılanysty "jalǵan aqparat" taratty degen aıyp taǵylǵan. Jaqynda qańtar oqıǵasy boıynsha qylmystyq kodekstiń 272-baby 1-tarmaǵy (jappaı tártipsizdikti uıymdastyrdy) jáne 274-baby 4-tarmaǵy (kórineý jalǵan aqparat taratty) boıynsha taǵy 2 aıyp taǵyldy. Janbolat Mamaıdyń jaqtastary men adam quqyǵy salasyndaǵy halyqaralyq Human Rights Watch jáne Amnesty International uıymdary belsendini qýdalaýdyń saıası astary bar ekenin aıtady.
Pikir qaldyrý