Jaqynda Qazaqstanda múmkindigi shekteýli balalardyń tamaǵy men kıim-keshegine memlekettik qazynadan bólingen qarjynyń qoldy bolǵandyǵy anyqtalǵan. Bul týraly «Qamshy» portaly Total.kz-ke silteme jasaı otyryp habarlaıdy.

QR Bas prokýratýrasy baspasóz qyzmetiniń  málimetterine súıensek, memlekettik qazynadan bólingen qarjyny jymqyrý faktileri elimizdiń bes oblysynda  anyqtalǵan.

Sonymen, Almaty qalasynda ornalasqan kemtar balalarǵa arnalǵan psıhonevrologıalyq patologıa ortalyǵynyń dırektory men esepshisi ortalyqtyń tamaqqa bólinetin qarjysynan 546 105 teńgeni jeke múddege paıdalanǵan. Atalmysh fakti boıynsha qazir sot saraptamalyq tergeý jumystary júrgizilýde.

Sonymen qatar, Shymkent qalasyndaǵy mamandandyrylǵan bóbekter úıinen 3,9 mıllıon teńge (azyq-túlik, gıgıenalyq zattar, kıim-keshekterge bólingen) dál osyndaı jolmen qoldy bolǵan. Sotqa deıingi tergeý jumystarynyń qorytyndysy boıynsha, atalmysh bóbekter úıiniń qoıma meńgerýshisi Sakkýlıeva shartty túrde 5 jylǵa  bas bostandyǵynan aıyrylǵan.

Sondaı-aq, kámelet jasqa tolmaǵandarǵa áleýmettik jeńildikter úshin bólingen qarajat ta orta jolda qoldy bolǵandyǵy belgili boldy. Tergeý jumystarynyń nátıjesinde az qamtylǵan jáne múmkinshiligi shekteýli balalarǵa bólingen 3,9 mıllıon teńge memleket qazynasyna qaıtarylǵan.

Al, Qostanaı oblysynda  ata-anasynyń qamqorlyǵynsyz qalǵan 15 kemtar bala jalpy somasy 1,6 mıllıon teńgeni qurıtyn, memleketten bólinýi tıis áleýmettik járdemin almaǵan.

Al, Atyraý oblysynda prokýrorlar múmkinshiligi shekteýli 33 balaǵa 900 myń teńge kólemindegi áleýmettik járdemaqysyn qaıtaryp bergen.

Mundaı faktiler Mańǵystaý jáne Almaty oblystarynda da tirkelgen.

QR Bas prokýratýrasynyń arnaıy tekserýiniń nátıjesiánde 3129 balanyń konstıtýsıalyq quqyǵy qorǵalǵan jáne atalmysh faktiler boıynsha 11 qylmystyq is qozǵalyp, 706 adam jaýapqa tartylǵan.