Beırýt. Sırıalyq belsendilerdiń jeksenbi kúni keshke bergen málimetteri boıynsha ILIM búlikshileri ejelgi Palmırada ornalasqan 2000 jyldyq tarıhy bar saltanatty qaqpany buzǵan. Bul týraly «Qamshy» portaly foxnews.com-ǵa silteme jasaı otyryp habarlaıdy.

Atalmysh qaqpa qalanyń ortalyq bóligindegi eń tanymal oryndardyń biri bolsa kerek. Jergilikti halyq kúni keshege deıin ony «Shól qalyńdyǵy» dep erkeletip atap kelgen eken. Osy jáne ózge de monýmentterdiń jıyntyǵy túp tarıhy Parsy elimen, Rım ımperıasymen baılanysty áıgili ustyntizbek (kolonnada) jalǵasqan kóshelerdiń kórki bolǵan.

Palmıra ejelgi keshenindegi halyq senetin Qudaılar ǵıbadathanasy da shabýyldyń astynda qalǵan. «Ejelgi jádigerler putqa tabynýshylyqty nasıhattaıdy, sondyqtan olardyń kózin joıý kerek» dep málimdegen eken búlikshiler toby. Dese de, tarıhı oryndardan tapqan kóne buıymdardy olar edáýir úlken somaǵa satýdy josparlap otyr.

Sońǵy aptada ILIM búlikshileri Palmıradaǵy 2000 jyldyq eki áıgili ǵıbadathany, úsh ejelgi mazarat ornalasqan munarany jarǵan bolatyn. Sońǵy talqandalǵan mádenıet orny búlikshilerdiń qolyna aǵymdaǵy jyldyń mamyr aıynda túsken kórinedi.