SHQO-da Tarbaǵataı aýdanynyń ortalyǵy Aqjar aýylynyń 100 jyldyǵy, dańqty qolbasshy han batyr Qarakereı Qabanbaıdyń 330 jyldyq mereıtoıyna oraı dúbirli doda, aıtýly shara ótti.

Aqjardaǵy Qabanbaı saıabaǵynda 25 aqshańqaı kıiz úı tigilip, jergilikti turǵyndar men aýdan qonaqtary qazaqtyń has batyry Qabanbaıdyń dańqty jolynan syr shertetin teatrlandyrǵan kórinisti tamashalap, rýhanı lázzat aldy.

Aıtýly sharaǵa SHQO ákiminiń orynbasary Nurjan Saılaýbekuly arnaıy kelip, jınalǵan jurtshylyqqa aqjarma tilegin jetkizdi.

"Bahadúr babamyz Qarekereı Qabanbaıdyń 330 jyldyq mereıtoıymen Aqjar aýdanynyń qurylýy qatar kelip, yrysty jer, berekeniń mekenine aınaldy. Oblys ákimi Danıal Kenjetaıuly Aqjar aýdanynyń keshendi damytý josparyna bıylǵy 1 mıllıard teńge bólinse, aldaǵy bes jylda atalǵan qarjy 5 esege kóbeımek. Sondaı-aq 48 joba iske asyrylyp, oǵan 7,8 mıllıard teńge qarastyryldy" dep atap ótti SHQO ákiminiń orynbasary Nurjan Saılaýbekuly.

Aıtýly is shara aıasynda respýblıkalyq deńgeıde qazaq kúresi uıymdastyrylyp, elimizdiń ár túkpirinen kelgen, saıdyń tasyndaı iriktelgen 36 balýan boz kilemde baqtaryn synaýda. Jeńiske jetken ógiz balýan men túıe balýanǵa avtokólikti demeýshiler syıǵa bermek.

Mádenı jáne sporttyq is sharanyń uıymdastyrý komıtetiniń tóraǵasy dúbirli toı jaıly óz pikirin bildirdi.

"Aqjar aýylynda úlken toı. Daraboz Qabanbaı batyr ulyqtalyp, sporttyq ári mádenı sharalar ótýde. Respýblıkalyq alaman báıge men kókpar ótpek. Jeńimpazdarǵa demeýshiler tarapynan avtokólik tartý etiledi. Sonymen qatar batyr baba rýhyna as berilip, Qabanbaı Qojaǵululynyń 330 jyldyq mereıtoıyna arnalǵan "Babalar erligi ultqa mura, urpaqqa úlgi" atty ǵalymdar, tarıhshylar, zıaly qaýym ókilderiniń qatysýymen ǵylymı-teorıalyq konferensıa ótti" dedi Talǵat Mázibaev.

Tarbaǵataı aýdanynyń ortalyǵy Aqjar aýylyndaǵy aıtýly qos mereıtoı sharasy "armany bolǵan azattyq" jazba aqyndar músháırasy, gala konsert pen merekelik ot shashý men qorytyndylanbaq.