Keshe, 21 tamyz kúni Almatyda «Qandas medısına mamandarynyń ǵylymı talqysy» degen ataýmen Qazaqstan táýelsizdigin alǵaly elge Qytaıdan kelgen qandastardyń ishinde medısına salasynda qyzmet etip júrgen mamandardyń arnaıy jıyny ótti. Konferensıaǵa «El-Aman medısına» ortalyǵynyń dırektory, ishki aýrýlar kafedrasy bas dárigeriniń orynbasary Dastan Razbaıuly men Damu Business Group qaýymdastyǵynyń basqarma tóraǵasy Qumar Jumahan bastamashyl bolǵan.

Dastan Razbaıuly jıyn el egemendigin alǵan 30 jylda adam janynyń arashasy bolǵan dárigerlerdi, medısına mamandaryn elge, halyqqa tanystyrý, sol arqyly olardyń eńbegin kópshilikke jetkizýdi maqsat etetinin aıtty.

–  Osy jınalysty ótkizýge kómek kórsetken Damu Business Group qaýymdastyǵyna, spıker aǵalarǵa, bastamany birinshi bolyp kótergen Serik Dúısenbiuly aǵamyzǵa, kelip qatysyp jatqan barlyq áriptesterime alǵysymdy bildirem, – dedi jıyndy ashqan «El-Aman medısına» ortalyǵynyń dırektory.

Damu Business Group qaýymdastyǵynyń basqarma tóraǵasy Qumar Jumahan is-shara birliktiń, yntymaqtyń arqasynda júzege asyp otyrǵanyn atap ótti.

Jıyn barysynda mamandar elimizdegi medısına salasyn birlese damytý joldaryn talqylap, saladaǵy jekelegen máseleler týraly óz tájirıbeleri negizinde baıandamalar jasady.

Qazaqstan Ulttyq Ǵylymı Medısına Ortalyk júrek ınstıtýtynyń dırektory Asqar Qadylbekuly sozylmaly júrek jetispeýshiligin emdeýdegi jańa tehnologıalar týraly jańalyqtardy bólisti.

«Kelun-Kazpharm» JSHS-nyń quryltaıshysy jáne atqarýshy dırektory Mereı Slamýly kompanıanyń damý barysy jóninde aıtsa, Ál-Farabı atyndaǵy Qazaq ulttyq zertteý ýnıversıteti Dárilik ósimdikterdi ǵylymı zertteý ortalyǵynyń dırektory Hımıa jáne organıkalyq zattar, tabıǵı qosylystar men polımerler tehnologıasy kafedrasynyń profesory, PhD doktory Janar Jeńisqyzy “Qazaqstanda ósetin dárilik ósimdikterdiń fıtohımıalyq beıini jáne bıologıalyq belsendiligi” atty ǵylymı baıandama jasasa, 
onkologıa jáne omyraý bezi, qalqansha beziniń mamany Jeńis Qalıazym omyraýbez raginiń qoltyq astyndaǵy lımfa túıinderiniń bıopsıasy týraly aıtty.

Almaty Shyǵys medısına ortalyǵynyń qyzmetkeri Erlan Qazezuly dástúrli qytaı medısınasy men ıne arqyly emdeýdiń mańyzy jáne onyń aýrýlardy emdeýdegi erekshe róline toqtalsa, Ulttyq ǵylymı medısınalyq ortalyqtyń Intervensıondy kardıologıa bóliminiń meńgerýshisi Beglan Stamboluly «Sozylmaly tolyq koronarlyq oklúzıaǵa arnalǵan ıntervensıalyq terapıanyń usynylǵan baǵyty», Ortoped, súıek mamany Muqaı Baýyrjan «Bel omyrtqa aralyq taqsysynyń bultıyp shyǵýy», Almaty Býchan klınıkasynyń ıgloterapevti Asqar Dákenuly MRT arqyly omyrtqa aýrýlaryn anyqtaý, pýlmonolog Dýtan Sáken týberkýlezdi sáýlelik dıagnostıkalaý jónindegi tájirıbelerin ortaǵa saldy.

Júrek-qan tamyrlar júıesiniń dárigeri Gúlnaz Seıdolla «Antıbıotık dárilerdiń klınıkada qoldanylýy» týraly ǵylymı jumysyn nazarǵa usyndy.

Konferensıa barysynda kúrmeýi kóp kúrdeli máseleler týraly aıtyldy

Aıtalyq, shet elge emdelip jatqan adamdarǵa analız jasaý, sol apparttardy kásipkerlerdiń kómegimen elge ákelý máselesi, naýqastyń shet elge barǵandaǵy jol shyǵynyn, emdelý aqysyn óteý jaǵdaılary, qarjy jetispeýinen shet eldegi em toqtap qalǵan jaǵdaılardy sheshý jaıy, shetelde emdelýge barǵandar kezigetin til máselesin sheshý joldary, medısına salasynan beıhabar mamannyń dáriger bolýy, naýqastardyń shet elge barýynan otandyq medısınanyń álsireýi, taza qazaq tilinde qyzmet kórsetetin emhananyń joqtyǵy sekildi túıitkilderdi sheshý amaldary týraly oılar aıtylyp, usynystar jetkizildi.