Qazaqstanda sary maı qymbattady. El boıynsha baǵanyń ósýi 15%-dy quraıdy, al keıbir óńirlerde ol odan da joǵary. Máselen, Mańǵystaý oblysynda maı baǵasy jyl basynan beri birden 29%-ǵa kóterilgen. Mundaı derekterdi Energyprom.kz portaly keltirip otyr.

El boıynsha 2022 jylǵy qańtardan shildege deıin 13,9 myń tonna sary maı óndirilgen. Bul – ótken jylmen salystyrǵanda 12,6%-ǵa az.

Shildede tuzdalmaǵan sary maıdyń bólshek saýdadaǵy quny kelisine 3,3 myń teńgege deıin jetken. Pavlodarda maıdyń kelisi 2,7 myń teńgeden satylsa, Atyraýda 4,3 myń teńgege deıin qubylǵan.

Aıtarlyqtaı qymbatshylyq Mańǵystaý oblysynda baıqalyp otyr. Ol jaqta maı baǵasy birden 29%-ǵa kóterilse, Shymkentte baǵanyń ósýi 26,7%, al Jambyl oblysynda 26,4%-dy quraǵan.

Qymbatshylyq Nur-Sultanda 3%, Almatyda 5,6%, Pavlodar oblysynda 7,2% shamasynda.

2022 jyldyń qańtar-mamyr aılarynda maı óndirisi ótken jylmen salystyrǵanda 12%-ǵa tómendegen. Import, kerisinshe, bir jylda birden 83,5%-ǵa ósti, bul – naryqtaǵy ımporttaýshylardyń úlesin 16,4%-dan 29%-ǵa deıin arttyrǵan. Qazir qazaqstandyq maı óndirýshiler halyqtyń osy ónimge degen qajettiliginiń 71%-yn qamtamasyz etedi.