Qazaqstan halqy Assambleıasy Ýkraınanyń Qazaqstandaǵy elshisi Petr Vrýblevskııdiń Reseı basqynshylyǵy týraly "keleshekte olar bizdiń balalarymyzdy óltirmeýi úshin orystardy kóptep óltiremiz" dep aıtqanyna baılanysty málimdeme jasady.

Assambleıa úndeýinde, uıym elshiniń sózderin qatań aıyptaıtyny, ondaı saryndaǵy málimdelerge jol berýge bolmaıtyny aıtylǵan.

"Beıbitshilik pen birlik bizdiń memlekettik saıasattyń jáne qoǵamdyq birigýdiń basty qaǵıdalary. Sondyqtan mundaı pikirdi kim aıtsa da bizdiń qarsylyǵymyzǵa ushyraıdy. Dıplomatıa – óshpendilik pen arazdyqty qozdyrý úshin emes, beıbitshilik pen yntymaqtastyq ıdealdaryna qyzmet etýi tıis. Qazaqstannyń birtutas kópetnosty halqy úshin dostyq, ózara kómek jáne beıbitshilik qaǵıdalary myzǵymaıtyn ustanym. Olar bizge Táýelsizdigimizdiń qalyptasýynyń eń qıyn jyldarynda da etnosaralyq qaqtyǵystardyń aldyn alyp, elimiz ben halqymyzdyń tutastyǵyn saqtaýǵa kómektesti. Óshpendilikti qozdyratyn kez-kelgen pikir, etnostyq jek kórýshilik pen onyń qandaı bolmasyn kórinisterin nasıhattaý biz úshin jat uǵym" delingen assambleıa úndeýinde.

Qazaqstan halqy Assambleıasy málimdeme kóp jasaı bermeıdi. Ásirese jurtshylyq elde sońǵy jyldary bolǵan etnosaralyq janjaldar kezinde assambleıadan naqty áreketter kútken. Alaıda uıym konflıkterde únsiz qalyp otyrdy. El arasynda assambleıanyń qoǵam úshin atqaryp otyrǵan qyzmeti shamaly, ony taratý kerek degen kózqarastaǵy adamdar az emes.