Júktilikke, bosanýǵa jáne jańa týǵan balany asyrap alýǵa baılanysty tabysynan aıyrylǵan jaǵdaıda tólenetin áleýmettik tólemdi taǵaıyndaý úshin ótinishti endi Elektrondyq úkimet portaly arqyly berýge bolady. Bul týraly Eńbek jáne halyqty áleýmettik qorǵaý mınıstrligi habarlady.

EGov.kz portaly arqyly ótinish berý úshin basty bette "Áleýmettik qamsyzdandyrý" bólimin ashyp, "Otbasylarǵa kómek" tarmaǵyn tańdap, tıisti qyzmetti tabý kerek.

Osydan keıin paıdalanýshy portalda avtorızasıalanyp, onlaın qyzmetke tapsyrys berýi, barlyq mindetti qatarlardy toltyrýy, talap etiletin faıldardy tirkeýi jáne usynylǵan nusqalardyń birimen ótinimge qol qoıýy qajet.

Ótinimdi eGov.kz portalynda qaraý merzimi 8 jumys kúnin quraıdy. Somasy kórsetilgen tólem taǵaıyndaý týraly habarlama nemese bas tartý týraly dáleldi jaýap paıdalanýshynyń jeke kabınetine jiberiledi.

Elektrondyq qujat jáne suraý salý nátıjesi týraly habarlama odan ári jeke kabınette, "Qyzmetterdi alý tarıhy" bóliminde qoljetimdi bolady.

Atalǵan qyzmetti eGov.kz portaly arqyly alý úshin jumys berýshiniń kadr qyzmeti toltyratyn eńbek sharttaryn esepke alýdyń biryńǵaı júıesinen elektrondyq málimetter qajet. Sondyqtan qyzmetti alýshy júktilikke jáne bala týýǵa, jańa týǵan balany asyrap alýǵa baılanysty demalysqa shyǵý týraly tıisti derekterdiń E-HR-ge engizilgenin naqtylaýy qajet.