Aptap ystyq Qytaıdy ábigerge salyp jatyr. Tabıǵattyń tosyn minezinen Qytaı ekonomıkasyna shilde aıynda 400 mıllıon dollar shyǵyn kelgen, dep jazady VVS-diń orys qyzmeti.

Shanhaıdyń Ianszy aımaǵyn jáne Qytaıdyń ońtústik-batysynda ornalasqan Sychýan provınsıasyn birneshe apta boıǵy qatty ystyq saldarynan qurǵaqshylyq jaılady.  Sychýandaǵy 40 gradýstyq ystyq pen jaýyn-shashynnyń az túsýi elektr energıasynyń jetispeýshiligine ákep soqtyrǵan. Sondyqtan provınsıa bıligi keıbir ónerkásip oryndaryn elektrmen jabdyqtaýdy shekteýge májbúr boldy.

Germanıalyq Volkswagen avtomobıl óndirýshisi Sychýan provınsıasynyń ortalyǵy Chendý qalasyndaǵy zaýyty ýaqytsha jumys istemeıtinin habarlady.

Apple-ge arnalǵan bólshekterdi jetkizetin Foxconn kompanıasy Sychýan provınsıasyndaǵy zaýytyn japty, biraq budan óndiristiń jalpy kólemine keletin zıan "shamaly" ekeni aıtyp jatyr.

Ystyq saldarynan 400 mıllıonnan astam qytaılyqty aýyz sýmen qamtamasyz etetin álemdegi úshinshi iri ózen – Ianszydaǵy sý deńgeıi tómendep ketken. Ianszy arnasyndaǵy sý deńgeıi negizi sońǵy bes jyldaǵy ortasha kórsetkishten 50%-ǵa tómendegen.

Sý deńgeıiniń túsýi gıdroenergetıkadan energıanyń 80%-dan astamyn alyp otyrǵan Sychýan provınsıasyna qatty áser etti.

Qytaı tótenshe jaǵdaılar mınıstrliginiń málimetinshe, qurǵaqshylyq saldarynan 780 myńnan astam adam memleket qoldaýyna muqtaj. Zardap shekken aýdandarǵa aýyz sý avtosısternalarmen jetkizilip jatyr.

Ótken aptada mınıstrlik shilde aıynda ystyqtyń ekonomıkalyq shyǵyny 2,73 mlrd ıýán (400 mln dollar) qurady dep habarlaǵan. Qarjy mınıstrligi apattardan zardap shekkenderge kómektesý úshin 300 mıllıon ıýán (44,30 mıllıon dollar) bóletinin málim etti.