Sońǵy kezderi Qıyr shyǵystan Eýropalyq odaqqa shekara asyp, jaqsy ómirdi maqsat tutyp kelgender sany kúnnen kúnge artýda. EO ta, ózge bólek memleketter de mıgranttardy qarsy alyp, ornalastyrý tarapynan múmkindikterin tym joǵary baǵalap jiberip, saldarynan biraz qınalyp qalǵanǵa uqsaıdy. Bul daǵdarys jańa máseleler týdyryp qana qoımaı, bosqyndardy ornalastyrý jónindegi Dýblındik kelisimge múshe-memleketter arasyndaǵy burynǵy qarama-qaıshylyqtaryn qaıta qozǵaýǵa májbúr etti.
Álemdik tarıhqa 2015 jyl Eýropanyń Ońtústik jáne Ońtústik-shyǵysynda ornalasqan elderdegi buryn sońdy bolmaǵan mıgrasıalyq daǵdarys kezeńi bolyp enýi ábden múmkin. Sebebi, Eýropalyq aımaqqa sharasyzdan qonys aýdarýshylar sany eshqashan osynshalyq kóp bolmaǵan. Swissinfo.ch aqparattyq portalynyń málimetteri boıynsha, 2015 jyldyń qyrkúıek aıyndaǵy ál-ahýalǵa sáıkes Eýropaǵa Jerorta teńizi arqyly ótkender sany 350 myń adamdy quraǵan. Bul kórsetkish 2014 jylǵy jaǵdaımen salystyrǵanda 60 paıyzǵa joǵary.
Qazirgi ýaqytta Germanıanyń ózine aǵymdaǵy jyldyń sońyna deıin 800 myń bosqyn barady dep kútilýde. Bosqyndar isimen aınalysatyn shveısarıalyq federaldy sekretarıattyń boljamy boıynsha Shveısarıaǵa 2015 jyly bosqyn statýsyn surap baratyndar sany 29 myńǵa deıin baratyn kórinedi (2014 jylǵy kórsetkish 23770 adamdy quraǵan).
Degenmen, bosqyndardy qorǵaý uıymynyń málimetteri boıynsha, qazirgi ýaqytta bosqyndardyń 86 paıyzy Eýropada emes, damýshy memleketterde ómir súrip jatyr. Máselen, Lıvan memleketiniń ózinde qonys aýdarǵandar sany halyq sanynyń 25 paıyzyn quraıdy.
Bosqyndar, negizinen Aýǵanstan, Sırıa syndy azamattyq soǵys júrip jatqan aımaqtar men Erıtreıa ispetti qatal ústemshil bılik ornaǵan memleketterden qonys aýdarýda.
Sońǵy jyldaǵy Eýropaǵa qonys aýdaryp, baspana surap, resmı túrde ótinish bergender sany 660 myńnan asady. Eýropada mundaı jaǵdaı sońǵy ret 1990 j.j. Iýgoslavıadaǵy soǵys kezeńinde ornaǵan bolatyn.
Nazgúl Nazar
«Qamshy» silteıdi
