Qostanaı oblysyndaǵy Lesnoe, Ozernoe, Baǵanaly, Kalınıno aýyldary men orman alqabynda órt sóndirý áli de jalǵasyp jatyr.

Órtti sóndirýge 196 birlik tehnıka, 7 áýe kemesi, 5 órt poıyzy, jeke quramnyń 1526 adamy, áskerı-áýe kúshteri armıa avıasıasynyń Mı-171 tikushaqtary jumyldyrylǵan. Qorǵanys mınıstrligi órt sóndirý júıesi bar Mı-17 tikushaqtarynyń taǵy úsheýi daıyn turǵanyn habarlady. 

Qazgıdromettiń málimetinshe, órt sharpyǵan Áýlıekól aýdanynda aýa temperatýrasy áli de joǵary – 31 gradýs. Al jeldiń jyldamdyǵy sekýndyna 7 m/s deıin jetedi. 

Tótenshe jaǵdaılar mınıstrliginiń qyzmetkerleri Ozernoe, Amanqaraǵaı, Kalınıno jáne Lesnoe aýyldarynan 1841 adamdy qaýipsiz jerge kóshirgen. Jergilikti atqarýshy organdar evakýasıalanǵandardy Áýlıekól orta mektebi men Áýlıekól mektep-ınternatyna ornalastyrǵan. Zardap shekkenderge psıhologıalyq kómek kórsetiletin bolady.

Qazir evakýasıalaý pýnktterinde 66 adam bar, qalǵandary úılerine oraldy nemese týystarynyń úıin panalaýda. Qostanaı oblysynyń ákimi Arhımed Muhambetov Qostanaı oblysynyń Áýlıekól aýdanynda orman órtinen zardap shekkenderge jańa úıler salýǵa jer bólingenin málimdedi. Ákim oblysta qys ońtústikke qaraǵanda erte túsetindikten jańa úıler qazan aıyna deıin salynyp bitýge tıis ekenin aıtty.

Órtten 10 adam aýyr jáne jeńil jaraqattar alyp, 1 adam qaza tapqan.

Búgin prezıdent Qasym-Jomart Toqaev Qostanaı oblysyna bardy.