Aldymen ákimshilik artynsha qylmystyq kodekstiń "jappaı tártipsizdikti uıymdastyrdy", "kórineý jalǵan aqparat taratty" degen eki aýyr babymen jarty jyldan beri tergeý ızolátorynda qamaýda otyrǵan qoǵam belsendisi, tirkelmegen Demokratıalyq partıanyń jetekshisi Janbolat Mamaı ózine qastandyq jasalýy múmkin ekenin habarlady.
Janbolat Mamaı abaqtydan joldaǵan hatynda jarty jyldan beri ózine qarsy qandaı da bir qorqytý, kúsh kórsetý oqıǵasy bolmaǵanyn, alaıda, keshe qastandyq jasalmaqshy bolyp jatyr degen habar alǵanyn jazady. Aıtýynsha, qorqytý sálemdemesi qańtar oqıǵasynan keıin qamalǵan qylmys áleminde esimi belgili Arman Jumageldıevten kelgen. Biraq ol qoqan-loqy artynda bılik tur dep sanaıdy.
"Maǵan "Mamaı ózi YouTube-te jarıalaǵan bir vıdeo úshin basymen jaýap beredi" dep jetkizdi. Bul kimniń sálemi dep suraǵanda, olar ózi de qamaýda otyrǵan "Dıkıı Arman» - Arman Jumageldıevten dep jaýap berdi. Shynymen-aq, ózimniń bir sózimde ony synaǵanym bar. Meniń oıymsha, bul "sálemniń" artynda, maǵan qastandyq uıymdastyryp jatqan, arnaıy qyzmetter turýy ábden múmkin. Altynbek Sársenbaıulynyń ólimi esterińizde bolar? Namysyna tıgen sózder aıtty-mys, eshkimge jábiri joq Útembaev tapsyrys bergen bolyp shyqpap pa edi? Bálkim, bılik maǵan qastandyq jasap, bar kináni qylmys áleminiń bedeldisine arta salmaq ta shyǵar. Ózim alǵan habarǵa qatysty meniń oıym osyndaı. Maǵan qatysty qandaı da bir qastandyqtyń artynda, qashan da, arnaıy qyzmetter men Qazaqstan bıligi turatyn bolady dep ashyq, resmı túrde málimdeımin! Túrmede eshkimmen ózara kıkiljińim joq, eshqashan da janjaldasqan emespin" deıdi ol.
Buǵan deıin saıası tutqyndar men Qańtar oqıǵasy qurbandaryna qoldaý kórsetý úshin qurylǵan qoǵamdyq "Arasha" komıteti qańtar oqıǵasyna qatysty isterdi tergeıtin vedomstvoaralyq tergeý-operatıvti top tergelip jatqandardy Janbolat Mamaıǵa qarsy kýálik berýge májbúrlep jatqany týraly aqparat jetkenin habarlaǵan. Al arnaıy prokýrorlar bul derekti teristegen.
