Qańtar oqıǵasy boıynsha aıyptalǵandardyń týǵan-týystaryn qoldaýǵa barǵan kezinde ustalǵan saıasatker Rysbek Sársenbaı ózin bosatqanyn habarlady. Bul týraly Nege.kz jazdy.

"Qańtar qyrǵyny boıynsha aıyptalǵandardyń týǵan-týystary isti ádil qaraýdy bılikten talap etti. Olar menen kómek surady. Polısıa adamdardy kúshtep áketpek boldy. Ara túsken meni de kúshtep qolymdy qaıyryp, kólikke mingizdi. Polısıa bóliminde meni kúshtep tergeýshige aparmaq boldy. Kim ekenimizdi, ne úshin kelgenimizdi anyqtaý kerek deıdi. Sol úshin súırep aparý kerek pe? Sol jerde de anyqtaýǵa bolady ǵoı! Sonyń saldarynan qan qysymym kóterilip ketti. Odan keıin júregim qaqty. Dárihanaǵa jibermedi, telefonymdy alyp qoıdy. Dárigerdi áreń shaqyrdy. Tergeýshi maǵan qatysty hattama toltyrýdan bas tartty. Alaıda muny ózim talap etip, hattama toltyrtqyzdym. Qazir jaǵdaıym qalypty", dedi Rysbek Sársenbaı.