13 qyrkúıekke qaraǵan túni Ázerbaıjan-Armenıa shekarasynda áskerı qaqtyǵys bastaldy, dep jazady TASS. Eki taraptan da jaralanǵandar men qaza tapqandar bar. 

Basylymnyń málimetinshe, Armenıa men Ázerbaıjan áskerı qaqtyǵysqa qatysty ártúrli aqparat taratyp, bir-birin aıyptap jatyr

"13 qyrkúıek kúni saǵat 00:05-ten bastap Ázerbaıjan Qarýly kúshteriniń bólimsheleri Gorıs, Sotk jáne Djermýk mańyndaǵy Armenıa terıtorıasyn artılerıamen, iri kalıbrli atqyshtarmen tópelep atqylaı bastady", - dep málimdedi Armenıa qorǵanys mınıstrligi.

Al Ázerbaıjan qorǵanys mınıstrligi Armenıa áskerılerin arandatý jasady dep aıyptady.

"12 qyrkúıekke qaraǵan túni Armenıa qarýly kúshteriniń bólimsheleri Ázirbaıjan-Armenıa memlekettik shekarasynyń Dashkesan, Kalbajar jáne Lachyn baǵyttarynda aýqymdy túrde dıversıa jasady", - dep málimdedi Ázerbaıjan qorǵanys mınıstrligi. 

Ázerbaıjan mınıstrliginiń málimetinshe, Erevan sońǵy bir aıda shekaradaǵy jaǵdaıdy maqsatty túrde ýshyqtyryp, shabýyl qarýyn, aýyr artılerıany jáne adam kúshin shoǵyrlandyrǵan. 13 qyrkúıekte osy aýdandardaǵy Ázerbaıjan áskerı pozısıalaryna oq jaýdyrǵan. 

Armenıa premer-mınıstri Nıkol Pashınán áskerı qaqtyǵysqa baılanysty Qaýipsizdik keńesiniń otyrysyn ótkizdi. Armenıanyń Qaýipsizdik keńesi Armenıa-Ázirbaıjan shekarasyndaǵy shıeleniske baılanysty Dostyq, yntymaqtastyq jáne ózara kómek týraly shartqa súıenip Reseı Federasıasynan kómek suraýǵa sheshim qabyldaǵan. 

"Armenıa respýblıkanyń egemendi aýmaǵyna jasalǵan agresıaǵa baılanysty Dostyq, yntymaqtastyq jáne ózara kómek týraly sharttyń, sondaı-aq Ujymdyq qaýipsizdik sharty uıymy men BUU Qaýipsizdik Keńesiniń erejelerin júzege asyrý maqsatynda Reseı Federasıasynan resmı túrde kómek surady" dep habarlady Armenıa Mınıstrler kabınetiniń baspasóz qyzmeti.