Reseıdiń 28 qalasynda ishinara mobılızasıaǵa qarsy narazylyqqa shyqqan 1400 adam ustaldy, dep habarlady "OVD-Info" portaly.

Ustalǵandardyń kópshiligi Sankt-Peterbýrgte (565 adam), Máskeýde (536 adam) jáne Ekaterınbýrgte (48 adam). Polısıa bólimderinde ustalǵandardyń keıbirine Reseı armıasynyń bedelin túsirý baby boıynsha hattamalar jasalǵan.

Máskeýdegi narazylyqqa shyqqandardyń kóbi áıelder. Olar "Balalarymyz ómir súrsin!", "Soǵysqa jol joq" dep urandatty. 

Sankt-Peterbýrgte Isaak soborynyń aldyna da áıelder kóp jınaldy. Olardy polısıa qorshap, tutqyndaý kezinde demonstranttardy rezeńke taıaqtarmen uryp-soqqan. 

Reseıdiń İshki ister basqarmasy elde ruqsat etilmegen mıtıń ótkenin habarlady. Alaıda ustalǵandardyń naqty sanyn jarıalamady. 

Sársenbi kúni Pýtın ishinara mobılızasıalaý (memlekettik qarýly kúshterdi beıbitshilik jaǵdaıdan soǵys jaǵdaıyna kóshirý) týraly qaýlyǵa qol qoıǵan.