Prezıdenttikke úmitker 12 kandıdattyń qatarynda el birshama biledi-aý, buǵan deıin osyndaı isterimen kózge túsip edi deıtindeı birdi-ekili adam bolsa, sonyń biregeıi "Asar" respýblıkalyq qoǵamdyq birlestigi atynan usynylǵan Haırolla Ǵabjalılov.

Kópshilikke Haırolla Ǵabjalılov ulttyq valúta – teńgeniń avtorlarynyń biri retinde tanys. Al "Alash" tarıhı-ǵylymı zertteý ortalyǵyn quryp, qazaq tarıhyn, onyń ishinde rý-taıpalardyń tarıhyn ǵylymı turǵyda negizdep jazýǵa kúsh salyp júrgenin jalpaq jurt bile bermeýi múmkin.

Biraz ýaqyt jeke bıznesine qol salmaq bolǵandarmen alysyp, ádiletsizdikke ushyraǵany bar.

Ol týraly belgili tarıhshylar rýhanıat janashyry dep jyly sóz aıtady.

Azdy-kópti adam biletin, aty bylǵanbaǵan, túrli saıası oıyndarda esimi atalmaǵan, tól teńge avtory retinde, teńgeni Reseıden jasyrynyp Londonda qalaı qıyndyqpen shyǵarǵandary týraly áńgimeleri arqyly bıografıasy jurtqa unamdy Haırolla Ǵabjalılov kandıdattar ishinde halyqqa jaqyn tulǵa kórinedi. Alaıda kandıdatqa qoıylatyn zań erejeleri bar emes pe edi...

Konstıtýsıanyń İİİ bólimi 41-baby 2-tarmaǵynda Qazaqstan Respýblıkasynyń prezıdenti bolyp týmysynan Respýblıka azamaty bolyp tabylatyn respýblıka azamaty ǵana saılana alady delingen. Al Haırolla Ǵabjalılov 1950 jyly 29 sáýirde búgingi Ózbekstan quramyndaǵy avtonomıalyq respýblıka Qaraqalpaqstannyń Tahtaqópir aýdanynda dúnıege kelgen.

Ortalyq saılaý komısıasy kandıdat retinde usynylǵan azamat konstıtýsıa men saılaý týraly konstıtýsıalyq zań normalaryna sáıkes keletinin ıa kelmeıtinin jiti tekseretinin Inga Imanbaı men Jasaral Qýanyshalındi zań talaptaryna saı kelmeıdi dep úmitker retinde tirkeýden bas tartqanda kópshilik kórdi.

Keńes Odaǵy tusynda QazKSR-de emes, biraq odaqqa múshe respýblıkalarda týǵandarǵa atalǵan zań normalarynyń qatysy joq pa  dep "Adam quqyqtary hartıasy" qoǵamdyq qorynyń atqarýshy dırektory Jemis Turmaǵambetovaǵa júgindik. Sarapshy kandıdattardy tirkeýde zań talaptary buljytpaı oryndalýy kerek, kandıdat týmysynan QazaqKSR nemese Qazaqstan azamaty bolýy kerek, Haırolla Ǵabjalılovtyń máselesi boıynsha Ortalyq saılaý komısıasy Konstıtýsıalyq keńeske júgine otyryp, kandıdattyń tirkelýi týraly túsinik berýge tıis deıdi.

Qamshy portaly atalǵan másele boıynsha Ortalyq saılaý komısıasyna saýal joldap,  jaýap alýǵa tyrysady.

Tolyqtyrý: Búgin, 13 qarasha kúni Ortalyq saılaý komısıasy Talǵat Ergalıev jáne Fatıma Bızaqovamen qatar Haırýlla Ǵabjalılovty prezıdenttikke kandıdat retinde tirkeýden bas tartty. Komısıa bas tartýǵa atalǵan tulǵalardyń memlekettik qyzmette mindetti eńbek ótiliniń joqtyǵy negiz bolǵanyn habarlaǵan.