Aqpan aıynan beri qamaýda otyrǵan belsendi, saıasatker, tirkelmegen Demokratıalyq partıanyń jetekshisi Janbolat Mamaıdyń isi sotqa jiberildi. Bul jóninde belsendiniń áıeli Inga Imanbaı habarlady.
"Búgin Janbolat Mamaı men advokattaryna aıyptaý aktisi berilip, onyń isi Bostandyq aýdandyq sotyna qylmystyq kodekstiń úsh baby boıynsha jiberildi. Qańtar boıynsha 400 bap (zańsyz mıtıń uıymdastyrý), 378 bap (polısıaǵa til tıgizý), 274 bap (nesıelik amnıstıa boıynsha jalǵan aqparat taratý). Janbolat ózine taǵylǵan aıyptyń eshqaısyn moıyndamaıdy, ózine qatysty istiń barlyǵyn saıası jala dep baǵalaıdy", dep jazdy Inga Imanbaı facebook paraqshasynda.
Inga Imanbaı Janbolat Mamaıdyń isi boıynsha kóptegen adam quqyǵy jónindegi halyqaralyq uıymdarǵa júgingen. Adam quqyǵy salasyndaǵy halyqaralyq Human Rights Watch jáne Amnesty International uıymdary máselege nazar aýdaryp, belsendini qýdalaýdyń saıası astary bar ekenin habarlap, bılikti Mamaıdy bosatýǵa shaqyrǵan.
Jýyrda Inga Imanbaı Eýroparlament otyrysyna onlaın qatysyp, ol jerde de Mamaı isin aıtqan. Al odan bir kún buryn Janbolat Mamaıǵa taǵylǵan "jappaı tártipsizdik uıymdastyrdy" degen aıyp "Beıbit jıyn ótkizý tártibin buzý" babymen (400-bap) almastyrylǵan. Inga Imanbaı bılik mundaı qadamǵa halyqaralyq qysymnan keıin bardy dep sanaıdy.
